Lider Karizmátiku, Kay Rala Xanana Gusmão, hein hela iha Sentru Izolamentu Vera Krús, Dili. Imajen TATOLI/Egas Cristóvão.

DILI, 12 abríl 2021 (TATOLI)–Diretór Sala Situasaun-Sentru Integradu Jestaun Krize (CIGC,sigla portugés), Brigadeiru Jenerál João Miranda ‘Aluk’, tun direta ba fatin izolamentu Vera Cruz, atu husu ba Líder istóriku, Kay Rala Xanana Gusmão, atu kontribui regra ne’ebé Estadu Timor-Leste impoin, hodi entrega mate-isin ba Governu atu hakoi tuir protokolu COVID-19 ne’ebé estabelese hosi Organizasaun Mundiál Saúde (OMS).

Xanana Gusmão lori família nia naran, la simu nia maluk atu hakoi iha Metinaro, hanesan fatin ne’ebé Governu deside atu hakoi mate-isin pasiente COVID-19.

“Ami hosi Sentru Integradu Jestaun Krize, lori Governu nia naran husu Maun Boot atu kontribui hakoi mate-isin tuir regra ne’ebé ita iha ona,” Brigadeiru Jenerál Aluk hateten, hafoin halo negosiasaun ho Xanana Gusmão iha fatin izolamentu, Vera Cruz, segunda ne’e.

Maski nune’e, eis Prezidente Republika, Xanana Gusmão, kontinua la aseita hakarak atu lori mate-isin entrega ba família hodi hakoi tuir lisan Timór.

“Ha’u lakohi entrega, imi mai uza forsa karik ha’u sei mantein iha ne’e to’o imi entraga mate-isin ba ami,” hateten eis Guelleiru ne’e.

Tuir observasaun Jornalista Agência TATOLI, nota katak daudaun ne’e Komandante Polísia Nasionál Timor-Leste (PNTL), Komisáriu Faustino da Costa, tun direta ba terrenu hodi orienta membru sira asegura fatin izolamentu.

Membru PNTL haruka ona família matebian atu husik fatin izolamentu hodi hein prosesu negosiasaun hosi Governu Timor-Leste, liuhosi CIGC ho Xanana Gusmão.

Aleinde ne’e, daudaun ne’e, Padre Domingos Maubere mós hamutuk ho Xanana Gusmão iha fatin izolamentu.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here