Ministra Saúde, Odete Maria Freitas Belo esplika hela siklu transmisaun COVID-19 ba lider nasionál, Kay Rala Xanana Gusmão, iha portaun sala izolamentu Vera Cruz, segunda (12/04/21). Imajen Tatoli/Egas Cristóvão.

DILI, 12 abríl 2021 (TATOLI)—Ministra Saúde (MS), Odete Maria Freitas Belo, husu ba líder karismátiku Kay Rala Xanana Gusmão, atu fiar kona-bá COVID-19 tanba ema barak iha mundu mak mate tanba virus ne’e.

Governante ne’e koko halo esplikasaun kona-bá síklu transmisaun COVID-19 hodi konvense Xanana Gusmão, ne’ebé tuur hela iha portaun sala izolamentu, tanba hakarak atu lori sai matebian Armindo Borges (47) hosi Suku Manu-Tasi, Postu Administrativu Ainaro, Munisipiu Ainaro, ne’ebé hakotu iis  tanba sofre COVID-19.

Notísia relevante:COVID-19: detetadu foun 38, kazu moderadu ida

Odete Belo dehan, família matebian iha ema na’in-rua mak pozitivu no ekipa saúde halo ona konfinamentu, nune’e labele hada’et ba ema seluk.

”Ami koko atu serbisu tuir avó Nana. Ami halo tuir protokolu ne’ebé iha no ami la bosok povu,” Odete hateten iha sentru izolamentu Vera Cruz, Díli, segunda ne’e.

Kona-bá ne’e, Kay Rala Xanana Gusmão, deklara hakarak kontribui ba Estadu atu hala’o kampaña kontra COVID-19, iha Timor Leste (TL), maibé la simu ho serbisu ne’ebé presta hosi parte profisionál saúde-sira.

“La simu tanba serbisu arbiru ne’e mak halo ema la fiar tiha ona kona-bá ezisténsia COVID-19,” Xanana hateten.

Xanana mós kontinua la fiar tanba matebian moras kleur ona ho stroke grave, maibé bainhira família lori ba ospitál, ikus-mai la konsege salva no rezultadu swab pozitivu COVID-19.

“Dehan katak protokolu. Ita haree hanesan protokolu ne’e sala, tanba matebian ne’e moras kle’ur ona iha uma. Família haree nia lorloron. COVID-19 ne’e transmisível la’ós hanesan dengue. Matebian moras iha uma, oinsá mak dehan COVID-19 tama fali nia-isin lolon, ida-ne’e mak ami la simu,” Xanana dehan.

Xanana haktuir katak, buat ne’ebé família matebian konta, bainhira raan sai hosi matebian-nia inus no ibun mak lori ba ospitál hodi halo análiza, rezultadu hatudu katak stroke mak halo ran sai.

“Protokolu iha ospitál dehan ema ne’ebé moras tenke halo duni teste atu nune’e labele  da’et  ba moras-sira seluk, ne’e ha’u respeita. Maibé, tanba stroke entaun ha’u la simu  katak nia mate tanba COVID-19,” Xanana haktuir.

Eis Prezidente Repúblika ne’e deklara mós katak, sei hamutuk ho família foti sai matebian lori ba hakoi iha matebian-nia moris fatin, no lakohi atu lori ba hakoi iha fatin ne’ebé Governu prepara iha Metinaro tanba konsidera matebian hakotu iis la’ós moras COVID-19.

“Ha’u hein tanba katuas ne’e la’ós sofre COVID-19, maibe mate tanba stroke. Ami sei hein atu ba hakoi nia. Ami hatene Estadu iha kaixaun 300, maibé ami hakarak nia isin-lolon, hodi ba hakoi iha fatin ne’ebé família-sira hakarak,” líder nasionál ne’e subliña.

Nune’e mós família matebian, Raul Vitorino dos Santos, hateten antes ne’e matebian sofre ona moras stroke no kabun bubu durante fulan ida, horisehik matebian hetan atakasaun no família transporta ba Hospitál Nasionál Guido Valadares  (HNGV) atu halo tratamentu, maibé la konsege salva.

“Ami triste tanba matebian hakotu iis  la’ós tanba COVID, maibé derrepente doutór-sira fó-sai rezlutadu swab  katak, ami-nia aman sofre COVID-19 mak mate. Entaun, hanesan oan ami la simu atu hakoi mesak iha Metinaro,” Raul Vitorino dos Santos hateten.

Oras ne’e daudaun, Kay Rala Xanana Gusmão kontinua tur-hela iha portaun sala izolamentu Vera Cruz no mós Ministra Saúde, Odete  Maria Freitas Belo hamutuk ho Diretora Jerál Prestasaun Serbisu Saúde, Odete da Silva Viegas, kontinua konsola hela líder karismátiku ne’e.

Família matebian mós prepara ona kaixaun iha sala izolamentu atu tula mate-isin hodi lori ba haloot tuir kultura família-nian.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here