Juventude sira lori spanduk halo asaun pasifiku iha Sentru Izolamentu Vera Krús, Dili, segunda (12/04/2021). Imajen Tatoli/Egas Cristovão

DILI, 12 abríl 2021 (TATOLI)—Grupu joven maizumenus ema 100 halibur malu iha estrada área sentru izolamentu Vera Krús, apoia asaun lider karismátiku, Kay Rala Xanana Gusmão, ba mate isin Covid-19.

Tuir observasaun Tatoli iha área konsentrasaun, ema lubun ne’e lori atributu ho letra mean “Viva Xanana Gusmão”, “Viva Timor-Leste”, no East Timor Free COVID-19”, hodi hananu mós kántiku “o hele lee..o hele laaa.., ami isin maubere, klamar mós maubere.”

Notísia Relevante: Komodoro Pedro Klamar Fuik konvense Xanana kona-ba mate-isin COVID-19

Polísia sira halo seguransa metin iha Sentru Izolamentu Vera Krús, Dili, segunda (12/04). Imajen Tatoli/Egas Cristovão

Prezensa juventude nian ne’e hodi hatudu solidariedade ba eis Prezidente Repúblika ne’e iha negosiasaun ho Governu atu entrega mate-isin, Armindo Borges, tinan 47, ne’ebé mate tanba COVID-19 no rai hela iha sentru izolamentu Vera Krús.

Família matebian hamutuk ho Xanana halo negosiasaun ho Governu liuliu Ministériu Saúde, Sentru Integradu Jestaun Krize Sala Situasaun (CIGC-SS) atu bele entrega mate-isin ba família, tanba sira la fiar katak sira-nia aman mate tanba COVID-19, maibé mate tanba moras estoke no ran sai hosi tilun no ibun.

Ho moras grave ne’e, família sira  kontaktu ekipa saúde hodi hala’o evakuasaun ba halo tratamentu iha Ospitál Nasionál Guido Valadares (HNGV), maibé ikus mai família simu informasaun dehan matebian Armindo Borges pozitivu COVID-19.

Tuir observasaun Tatoli nian, Komandante PNTL Munisípiu Dili, Superintendente Xefe Henrique da Costa ho Komandante Batallaun Orden Públiku (BOP), Unidade Polísia Marítima (UPM) no Taskforce Dili kontinua halo seguransa metin hodi evita mosu situasaun ne’ebé la kontroladu.

Notísia Relevante: CIGC husu Xanana kontribui hakoi mate-isin tuir protokolu COVID-19

Purvolta tuku 15: 00, Diretór CIGC-SS, Brigadeiru Jenerál João Miranda “Aluc Descartes” ho ekipa ba hasoru Kay Rala Xanana Gusmão hodi negosia foti mate-isin ba haloot iha semitériu COVID-19 iha Metinaru, maibé prosesu negosiasaun la hetan solusaun. Nune’e, Brigadeiru Jenerál Aluc Descartes fila-fali de’it no Xanana ho joven sira, inklui família matebian mantein iha izolamentu Vera Krús.

“Ha’u fiar COVID-19 ne’e iha, maibé ha’u la fiar ema ne’e mate tanba COVID-19, ema ne’e moras fulan ida ona iha uma de’it. Nia feen ho oan sira trata nia moras estroke to’o ran sai hosi ibun no inus, tanba ne’e família sira lori ba hala’o tratamentu iha ospitál. Agora, rona nia mate dehan fali nia mate tanba COVID-19. Ne’e ita bosok”, Xanana lia tun ba Aluc iha hasoru malu ne’e.

Diretór CIGC-SS, Brigadeiru Jenerál João Miranda “Aluc Descartes” fó korajen ba família no husu atu família no Xanana kolabora ho Estadu hodi ba haloot mete-isin tuir protokolu saúde nian. Maibé Xanana kontinua rejeita no  husu atu entrega mate-isin ba família haloot tuir sira-nia tradisaun.

“Imi bele uza forsa mai kaer ha’u. Mate ne’e la entrega ba família, ha’u mós la fó ulun to’o imi mai tiru-mate de’it ha’u,” Xanana lia tun ba Komandante Aluc.

Bainhira  Diretór CIGC-SS, Brigadeiru Jenerál João Miranda “Aluc Descartes” ho nia ekipa fila tiha.  Liu minutu  30, Xanana simu telefone hosi Brigadeiru Jenerál Cornelio Ximenes “Mau Nana” hodi negosia atu Xanana bele koopera ho Estadu no Governu.

Maske nune’e esforsu hosi Brigadeiru Jenerál Cornelio Ximenes “Mau Nana” hela ho esforsu, tanba Xanana kontinua mantein nia pozisaun atu entrega duni mate-isin ba família sira haloot, tanba Xanana mós fiar katak matebian mate la’ós tanba COVID-19.

Xanana ho Amu Domingos Maubere iha sentru izolamentu Vera Krús, Dili, segunda (12/04). Imajen Tatoli/Egas Cristovão

Iha Padre Domingos “Maubere” nia sorin, Xanana simu telefone no esplika mós ba Brigadeiru Jenerál “Mau Nana” kona-ba situasaun  oinsá maka matebian ne’e nia moras to’o hakotu iis iha HNGV, horikalan.

Iha fali oras balun nia laran, Komodoro Donaciano Costa Gomes “Pedro Klamar Fuik”,  nu’udar reprezentante VIII Governu Konstituisaun to’o mós iha Sentru Izolamentu Vera Krús hodi hasoru-malu ho Komandante Em-Xefe FALINTIL, Kay Rala Xanana Gusmão, hodi trata situasaun sira-ne’e no buka solusaun. Maibé, parte rua sei iha negosiasaun nia laran no Xanana kontinua mantein entrega mate-isin ba família sira atu halo prosesu funerál la’ós lori ba haloot iha semitériu COVID-19 iha Metinaru.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here