Primeiru Ministru (PM) Taur Matan Ruak partisipa iha lansamentu vasina AstraZeneca ne’ebé hala’o iha Klínika Bairru Formosa, Dili, kuarta (07/04/21). Imajen Tatoli/António Gonçalves.

DILI, 07 abríl 2021 2021 (TATOLI)—Governu lansa ona vasina AstraZeneca, hanesan asaun ikus ba prevensaun COVID-19, iha Timor-Leste (TL).

“Ita halo lansamentu ba vasina infesaun kontazioza-nian. Vasina ne’e hanesan asaun ikus ba prevensaun COVID-19,’’ Ministra Saúde (MS), Odete Maria Freitas Belo, hateten iha ámbitu lansamentu vasina AstraZeneka iha Bairru Formoza, kuarta ne’e.

Notísia relevante:AstraZeneca doses 24.000 to’o ona TL

Odete esplika, ho lansamentu ne’e sei tulun atu kombate COVID-19, liuliu sei halo ema hotu-hotu iha imunidade forte, nune’e nia husu atu sidadaun hotu partisipa iha imunizasaun iha tinan ne’e.

“Ita-nia preparasaun hahú kedan hosi treinamentu ba profisionál saúde, fó informasaun ba komunidade  no lori vasina to’o ita-nia rain gasta millaun $1.5,” Ministra ne’e konta tuir.

Orsamentu ne’e rasik mai hosi Ministériu Saúde (MS), hetan mós apoiu hosi doadór-sira hanesan Organizasaun Mundiál Saúde (OMS), Fundu Nasaun Unida ba Infánsia (UNICEF) no organizasaun-sira seluk tan.

Tuir planu, Ministériu Saúde sei fahe kartaun ka billete ba ema hotu ne’ebé simu ona vasina ne’e, hanesan buat ne’ebé nasaun seluk halo ona.

“Bainhira  hakarak ba ema nia-rain  ka tama mai TL sei hatudu billete COVID-19, atu justifika katak, ita simu ona vasina ida-ne’e hodi prevene ita nia saúde,’’ nia subliña.

Iha lansamentu ne’e, Primeiru Ministru (PM), Taur Matan Ruak mak hanesan ema dahuluk ne’ebé simu vasina ne’e, inklui Prezidente Tribunál Rekursu (PTR), Deolindo dos Santos, Arsebispu Arkedioseze Metropolitana Dili, Dom Virgílio do Carmo da Silva, SBD, Prezidente Parlamentu Nasionál, Aniceto Guterres, Vise-Primeira Minsitra, Armanda Berta dos Santos, eis Prezidente Repúblika, José Ramos Horta no Koordenadór Forsa Tarefa Prevensaun no Mitigasaun COVID-19, Rui Maria de Araújo.

Partisipa iha lansamentu ne’e, membru Governu,  membru Parlamentu Nasionál, reprezentante OMS, reprezentante UNICEF iha TL,  diplomata-sira inklui parseiru dezenvolvimentu-sira.

Notísia relevante:UE orgullu tanba AstraZeneca to’o ona TL

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here