Ai-moruk vasina COVID-29, ho tipu AstraZeneca doses rihun 24 to’o ona Timor-Leste, ho My Indo Airlines. Imajen Tatoli/António Gonçalves.

DILI, 05 abríl 2021 (TATOLI)—Fundu Nasaun Unida ba Infánsia (UNICEF), liu hosi COVAX facility transporta ona ai-moruk vasina COVID-29, ho tipu AstraZeneca doses rihun 24 mai Timor-Leste (TL), ho My Indo Airlines.

AstraZeneca doses rihun 24 ne’e to’o iha Aeroportu Internasionál Nicolau Lobato, Comoro, Dili iha oras 13:00.

Notísia relevante:AstraZeneca dozes rihun 24 sei to’o TL iha segunda

Ai-moruk ne’e simu direta hosi Ministra Saúde (MS), Odete Maria Freitas Belo hamutuk  Vise-Ministru Saúde, Bonifácio ‘Maucoli’ dos Reis, Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, inklui reprezentante parseiru dezenvolvimentu-sira iha Timor-Leste.

Reprezentante Organizasaun Mundiál Saúde (OMS) ho reprezentante UNICEF iha TL, hala’o kedan serimónia entrega ba Ministériu Saúde (MS).

“Ita halo termu entrega ba vasina COVID-19 hosi OMS no UNICEF. La’ós ajénsia rua ne’e de’it mak halo esforsu ida ne’e maibé esforsu ne’e koletivu, hamutuk ho parseiru-sira seluk mak  ohin ai-moruk ne’e to’o ita-nia rain,’’ Odete Belo hateten iha serimónia entrega, segunda ne’e.

Odete Belo agradese ba parseiru-sira hotu ne’ebé esforsu hamutuk iha tempu naruk nia laran, liuliu UNICEF ho OMS, no ohin konsege lori ai-moruk ne’e to’o TL, atu bele halo vasina kontra COVID-19 ba populasaun iha rai ne’e.

Hafoin serimónia entrega, transsporta kedan ai-moruk ne’e ba iha armazén sentrál Serbisu Autónomu Medikamentu no Ekipamentu Saúde (SAMES), Kampung Alor.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here