My Indo Airlines ne’ebé tula AstraZeneca ba vasina COVID-19, doses rihun 24 bainhira to’o iha Aeroportu Internasionál Nicolau Lobato, Comoro, Dili, segunda (05/04/21). Imajen Tatoli/António Gonçalves.

DILI, 05 abríl 2021 (TATOLI)—Uniaun Europeia (UE) orgullu tanba Fundu Nasaun Unida ba Infánsia (UNICEF), liu hosi COVAX facility transporta ona ai-moruk vasina COVID-29, ho tipu AstraZeneca doses rihun 24 mai Timor-Leste (TL).

UE konsidera doses hirak ne’e hanesan primeiru fornesimentu hosi COVAX Facility ho ninia prestasaun ne’ebé kompletamente sei fó vasinasaun ba populasaun 20% iha TL.

Notísia relevante:AstraZeneca doses 24.000 to’o ona TL

Ekipa Europeia orgullu tebes ho kontribuisaun COVAX-facility nian, hodi ajuda fó asesu no justu ba vasina Timoroan-sira, liu hosi parseria ho Organizasaun Mundiál Saúde (OMS), ho inisiativa globál GAVI, no UNICEF.

“Ha’u haksolok tebes tanba ohin loron ita iha ona fornesimentu dahuluk ba vasina COVID-19 nian mai Dili, TL. COVAX Facility hanesan ilustrasaun di’ak ida kona-bá solidariedade globál. Ne’e mak hahalok multilaterál loloos. Uniaun Europeia orgullu hamutuk ho Governu TL, OMS, UNICEF, no mós kontribuinte-sira seluk hodi halo ida ne’e akontese. Ha’u fó omenajen ba pesoál saúde liña frente no ba sira hotu ne’ebé serbisu maka’as iha luta kontra COVID-19 iha TL. Ekipa Europeia sei hamriik nafatin ho povu Timor-Leste,” Embaixadór Uniaun Europeia, Andrew Jacobs, hateten via komunikadu ne’ebé Agência Tatoli asesu, segunda ne’e.

Uniaun Europeia  iha prioridade aas liu hodi garante katak ema hotu iha asesu ba vasinasaun COVID-19 nian ne’ebé seguru no efetivu.

Bazeia ba aproximasaun  ekipa Europeia-nian, UE durante ne’e kompromete ona osan hamutuk billaun $ 2.6 ba COVAX Facility atu fó posibilidade ba nasaun hamutuk 92 ne’ebé iha rendimentu ki’ik liu no médiu, inklui Timor-Leste atu asesu ba vasina COVID-19 billaun $1.3.

Uniaun Europeia nia asisténsia sei la para de’it hodi transporta vasina tanba transportasaun vasina ne’e nu’udár pasu importante ida, maibé buat hirak ne’e sira sei la vale bainhira nasaun sira la hó kapasidade sufisiente iha sistema nasionál saúde atu implementa kampaña vasinasaun.

Iha loron 18 Janeiru, Uniaun Europeia disponível ona millaun $2.4 ba OMS Timor-Leste atu apoia ninia serbisu ho Ministériu Saúde, hodi hamenus impaktu saúde hosi moras hada’et ba komunidade – partikularmente COVID-19 no mós atu kontribui ba harii sistema saúde ne’ebé forte, efetivu no reziliente.

Desde abríl 2020, valór apoiu hosi ekipa Europa hodi responde COVID-19 iha TL-nian hamutuk liu millaun $5.

Ekipa Europeia nian iha € 40 billaun Euro, iha misaun globál atu apoia país parseiru-sira iha mundu tomak iha luta hasoru pandemia Coronavírus no ninia konsekuénsia-sira, ne’ebé envolve fó atensaun ba nesesidade imediata saúde-nian no umanitáriu, hodi reforsa sistema saúde no apoia rekoperasaun ekonómika no protesaun sosiál.

Ekipa Europeia – Uniaun Europeia, ninia Estadu-membru sira no Banku Investimentu Europeu – hanesan kontribuinte ba inisiativa multilaterál COVAX, ho osan liu billaun EUR 2.2/$2.6.

Notísia relevante:COVAX Facility oferese millaun $7 ba vasinasaun AstraZeneca iha TL

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here