Pesoál Aviasaun-nian hatun ai-moruk vasina COVID-29, hosi aviaun My Indo Airlines iha Aeroportu Nicolau Lobato, Comoro, segunda (05/04/21). Imajen Tatoli/António Gonçalves.

DILI, 05 abríl 2021 (TATOLI)—Reprezentante Organizasaun Mundiál Saúde (OMS) iha Timor-Leste (TL), Arvind Mathur, agradese ba inisiativa estraordináriu hosi COVAX facility, ne’ebé transporta ona vasina COVID-19 ho tipu AstraZeneca to’o Dili, no apela ba populasaun atu labele ta’uk simu vasina ne’e, hodi  proteje saúde hosi virus ne’ebé oras ne’e invade mundu.

“Finalmente ita hetan ona instrumentu importante liu iha ita-nia luta kontra pandemia COVID-19  vasina. Ida-ne’e mai iha tempu ne’ebé nasaun enfrenta númeru kazu ne’ebé aumenta hela. Vasina ne’e sei konsolida ita-nia esforsu atu hapara propagasaun moras ne’e. Ha’u hakarak atu agradese inisiativa estraordináriu hosi COVAX, ne’ebé halo vasina sai realidade ba nasaun ki’ik liu hanesan TL. Inisiativa ne’e mós fó esperansa, maské dezafiu oioin, ekuidade ba vasina mak posível no bele alkansa bainhira iha vontade entre parte interesada-sira,” Arvind Mathur, hateten liu hosi komunikadu ne’ebé Agência Tatoli asesu ohin.

Notísia relevante:AstraZeneca doses 24.000 to’o ona TL

Arvind Mathur mós apela ba populasaun TL atu labele tauk hodi simu vasina ne’e, liuliu liña frente-sira, tanba bele proteje saúde hosi virus aat ne’e.

“Agora vasina iha ne’e ona, entaun ha’u halo apelu ba ema hotu, pesoál saúde sira, pesoál liña-frente-sira no sira ne’ebé elejível ba vasina iha grupu distribuisaun dahuluk, atu sira simu vasina ne’e la-hó ta’uk, vasina ne’e seguru no sei proteje la’ós ita-boot sira de’it, maibé mós sira ne’ebé ita-boot sira hadomi. Tempu atu hatudu ita-boot sira nia kontribuisaun ba luta kontra pandemia ida-ne’e,” Mathur apela.

Nune’e mós Koordenador rezidente Organizasaun Nasaun Unida (ONU) iha TL, Roy Trivedy, konsidera vasina ne’e sei asegura populasaun TL hosi surtu COVID-19.

“Ohin loron marka momentu istóriku ba Governu no Nasaun Unida iha Timor-Leste ne’ebé serbisu maka’as tebes ona. Ha’u-nia parabens ba Ministériu Saúde, OMS no UNICEF ne’ebé lidera atinjimentu importante ida-ne’e ho apoia hosi parseiru hotu-hotu. Envia dahuluk vasina COVID-19 hosi fasilidade COVAX ida-ne’e hanesan pasu ida ba oin atu asegura katak populasaun Timor-Leste, liuliu serbisu liña-frente sira, sei la husik iha kotuk ba vasina ne’ebé salva moris”, Koordenador rezidente ONU, Roy Trivedy hateten.

Alende ne’e, reprezentante UNICEF iha TL, Bilal Durrani, dehan vasina ne’e lori duni esperansa ba populasaun TL ne’ebé sei salva-aan hosi CIVID-19.

“Vasina sira reprezenta esperansa ba labarik TL ho sira-nia família. Labarik-sira nia asesu ba edukasaun, saúde no serbisu protesaun hetan disrupsaun boot tanba pandemia ne’e. Vasina sira sei to’o populasaun alvu-sira, no ida-ne’e sei ajuda kontrola pandemia, atu nune’e ita bele hahú fali serbisu atu harii futuru di’ak liu, seguru liu, no saudável liu ba ema hotu-hotu, liuliu ba labarik-sira no sira-nia inan,” Bilal Durrani dehan.

Nia mós konsidera vasina ne’ebé to’o ona ohin hatudu ezemplu solidariedade globál liuhosi responde ba dezafiu boot liu iha mundu.  Ne’e mós hatudu posibilidade boot liu atu kria fali futuru di’ak liu ba família iha TL, liuhosi mobiliza matenek globál, rekursu hosi doadór-sira no komitmentu hosi Estadu Repúblika Demokrátika Timor-Leste.

Durante fulan hirak ona, parseiru COVAX-sira suporta Governu no parseiru iha mundu tomak atu prepara ba momentu ida-ne’e.

Iha Timor-Leste, OMS no UNICEF suporta ona dezenvolvimentu Planu Nasionál Implementasaun Vasina no kampaña sensibilizasaun iha nível nasionál no sub-nasionál, no UNICEF suporta haforsa korente malirin ka cold chain.

UNICEF ho OMS mós suporta formasaun ba pesoál saúde ba introdusaun no implementasaun vasina, identifikasaun no enumerasaun grupu prioridade-sira, transporte no armazén vasina, administrasaun vasina no jestaun ba efeitu sekundáriu  ka side effects.

COVAX ho fornesimentu vasina suporta hosi finansamentu jenerozu hosi Governu Austrália, Butaun, Kanada, Kolombia, Repúblika Koreia, Kuwait, Mónako, Nova Zelándia, Qatar, Saudi Arábia, Singapore, Ekipa Europa, Reinu Unidu, Estadus Unidus Amérika no doadór no instituisaun seluk-tan.

COVAX sei fó anunsiu kona-bá alokasaun tuir-mai bainhira vasina sei disponível atu haruka.

Fasilidade COVAX iha objetivu atu asegura vasina sufisiente ba porsentu 20 hosi populasaun hosi nasaun sira ne’ebé partisipa, hodi ajuda redús taxa mortalidade, proteje sistema saúde-sira no hahú fila-fali serbisu saúde esensiál-sira.

Nasaun ho rendimentu ki’ik no médiu ne’ebé tama iha Komitmentu ba Merkadu Avansadu (AMC) iha Fasilidade COVAX la selu ba porsentu 20 hosi doze ne’ebé simu.

Entretantu, TL simu ona vasina COVID-19 hamutuk doze 24.000 iha loron 5 abríl 2021, faze vasina dahuluk ne’ebé aloka liuhosi COVAX Facility ba pursentu 20 hosi populasaun TL, ne’ebé kompostu hosi grupu prioridade.

 Kona-bá COVAX Facility

COVAX facility, pilár vasina ba Aseleradór Asesu ba Instrumentu COVID-19 (ACT), lidera hosi Koalisaun ba Inovasaun iha Preparasaun no Preparasaun Epidémiku (CEPI), Gavi, Aliansa Vasina (Gavi) no Organizasaun Mundiál Saúde (OMS), ne’ebé serbisu parseria ho UNICEF nu’udár parseiru xave, organizasaun hosi sosiedade sivíl-sira, fabrikante vasina-sira, Banku Mundiál no seluk-tan.

Iha nasaun Amerikanu-sira, Fundu Mudansa PAHO (PAHO Revolving Fund) mak ajente rekoñesidu ba fornesimentu COVAX.

Komitmentu ba Merkadu Avansadu hetan fundu liuhosi governu jenerozu-sira, setór privadu, parseiru filantrópiku no multilateral-sira. Haree iha AMC donor table ba lista kompleta komitmentu sira.

Notísia relevante:UE orgullu tanba AstraZeneca to’o ona TL

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here