Xefe Bankada Partidu Demokrátiku (PD), António da Conçeição ‘Kalohan'. Imajen/ Egas Cristovao.

DILI, 02 abríl 2021 (TATOLI)—Bankada parlamentár Partidu Demokrátiku (PD) no Kmanek Haburas Unidade Nacional (KHUNTO) husu Governu la presiza hein Orsamentu Retifikativu (OR) maibé ezekuta Orsamentu Jerál Estadu (OJE) 2021 ne’ebé aprovadu no promulgadu hodi fó resposta urjénsia ba abitante sira-nia nesesidade.

Notísia Relevante: PN aprova proposta OJE 2021 iha finál globál

Xefe Bankada PD, Deputadu António da Conceição, hateten la’ós problema orsamentu retifikativu ne’e maske retifikativu ne’e foti hosi OJE 2021, maibé OJE 2021 ne’e aprovadu hosi Parlamentu Nasionál no promulgadu hosi Prezidente Republika.

“Ne’e signifika Governu iha kondisaun atu fó solusaun. Retifitikativu ne’e atu halo ajustamentu ba buat ne’ebé ladauk la’o, la’ós mós razaun atu hein orsamentu retifikativu. Agora OJE 2021 aprovadu no promulgadu, ida-ne’e mak baze orsamentu ne’ebé mak Governu tenke ezekuta ona. Ha’u triste haree situasaun povu nian, laiha ukun-na’in iha rai ida-ne’e karik,” Xefe Bankada PD, Deputadu António da Conceição ‘Kalohan’ informa ba Agência TATOLI liuhosi telefónika, realasional ho abitanta sira rihun resin iha Dili husu hakarak atu fila ba sira ida-idak nia knua moris fatin, sesta ne’e

Xefe Bankada PD ne’e preokupa ho papél Ministériu Solidariedade Sosiál (MSSI) no Inklusaun no Ministru Koordenadór Asuntu Ekonómika (MEKAE), tanba loloos ne’e tenke fó solusaun ho urjénsia ba situasaun atuál.

Nia haktuir, iha diskusaun OJE 2021, bankada PD propoin hasai fundu kontinjénsia hodi halo atividade bainhira situasaun seluk mosu maibé sira dehan labele.

“Situasaun mak agora ne’e, situasaun saida tán mak sira hein. Ne’ebé, ba ha’u Governu iha kondisaun atu hala’o hela maibé Governu laiha kapasidade atu halo interpretasaun ba iha nia aktu governativu ne’e rasik, tanba ejizénsia agora ne’e ita kuandu hola medida polítika ita tenke sura tiha ona konsekuénsia saida mak atu mosu mai,” Eis Ministru Komérsiu, Indústria no Ambiente ne’e fó hanoin ba Governu.

Nia fundamenta, bainhira deklara Estadu Emerjénsia ne’e mós tenke sukat kedas ho efeitu polítika sira hodi análiza molok hola desizaun polítika.

“Agora se desizaun polítika ne’e halo tan de’it COVID-19 maibé depois la hatene atu rezolve fila-fali impaktu ne’e rasik, ne’e hamenus de’it povu nia fiar ba Governu,” nia lamenta.

Deputadu António da Conceição prefere membru governu sira mak tenke tún direita hodi fó esplikasaun klaru ba atitante sira la’ós  PNTL de’it.

Nia afirma, Governu mak hasai desizaun entaun Governu tenke ser ba, ministru ruma tenke ser ba iha-terrenu hodi ko’alia kona-ba saida mak sira hanoin atu halo no depois husik povu ne’e fila lai hodi tuur hakmatek.

“Hodi dehan saida ba abitante sira, atu teste mak ba ka imi hela mak ami fó haan. Desizaun ruma tenke ser iha, labele hola desizaun atu sulan de’it povu no kastigu hela de’it povu. Problema agora ne’e estudante sira hamlaha. Se sira agora ne’e laiha ona osan atu selu kost ne’e, oinsá. Medida polítika ne’ebé Governu bele hola, ha’u hanoin buat sira hanesan fásil hela,” nia dehan.

Bankada PD propoin $200 ba estudante sira hodi sosa haan no selu kost, hola pulsa eletrisidade tanba apoia sira-ne’e sei fila-fali ba Estadu, la’ós buat ne’ebé fó gratuita.

“Labele altera de’it dekretu-lei hodi liberta de’it Naimori hosi Novo Horizonte ba nia uma ne’e fásil atu halo, maibé ba populasaun barak ne’ebé fó votu ba ukun ne’e ignora tiha fila-fali, ne’e laiha responsabilidade ukun,” Xefe Bankada PD ne’e hateten.

Entretantu, Deputadu Bankada Kmanek Haburas Unidade Nacional Timor Oan (KHUNTO), Luis Roberto da Silva, hateten estudante sira hosi munisípiu hela iha Dili enfrenta difikuldade ba ai-han kada loron nian no osan ne’ebé atu responde ba sira-nia nesesidade kada loron nian.

Tanba, nia dehan, tuir loloos ne’e Governu tenke kria jestaun atubele ajuda ho urjénsia ba estudante sira-ne’ebé hela iha kost, osan sosa pulsa ba pakote online ninian, Governu tenke fó resposta ho urjénsia.

“Labele haruka sira fila-fali ba sira-nia munisípiu. Se ita haruka fila-fali ba sira-nia munisípiu entaun Governu laiha responsabilidade morál atubele fó solusaun ba problema estudante sira-nian tanba sira mak futuru nasaun nian,” nia dehan.

“Ha’u hanoin orsamentu retifikativu ne’ebé foin lalais Governu propoin submete ba ne’e, ida-ne’e fó resposta ba COVID-19 maibé agora daudaun situasaun emerjénsia hanesan ne’e Governu labele hein fali orsamentu retifikativu. Governu kria jestaun hodi responde daudaun ona ba ita-nia estudante sira-ne’e. Ha’u hanoin nasaun ida, Governu sempre iha osan, fila-fali jestaun Governu nian,” nia hateten.

Deputada Bankada Partidu Libertasaun Populár (PLP), Deputada Domingas dos Santos, hateten foin lalais Parlamentu Nasionál aprova ona estensaun Estadu Emerjénsia ba dala-XII maibé Governu loke nafatin kurridór.

“Se mak ba munisípiu bele maibé tenke tuir regra saúde nian katak abitante sira tenke ba teste swab no depois hetan autorizasaun mak bele sai. Maibé ita ulun-fatuk to’os, ita lakohi halo tuir regra sira-ne’e, lori fali moras ne’e ba fali munisípiu no depois ita fó sala ba Governu. Ne’e hatudu katak ita lakohi rona malu no ita lakohi respeitu ita-nia Governu,” nia dehan.

Nia husu ba abitante sira tenke koopera no rona rona mós Governu ko’alia tanba saúde públiku ne’e importante liu, tanba iha Dili númeru pozitivu COVID-19 loron ba loron aumente beibeik, entaun husu ba abitante sira atu koopera hodi hein desizaun hosi Governu tuir mai.

Notísia Relevante: La aguenta ona ho SS iha Dili, abitante sira reklama fila ba munisípiu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here