Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 12 dezembru 2020 (TATOLI)—Parlamentu Nasionál (PN), iha sábadu ne’e aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1,895 iha finál  globál.

Maski Bankada parlamentár Congresso Nacional Reconstrução Timorense (CNRT) deside la partisipa iha diskusaun espesialidade no finál globál, maibé proposta-lei no 23/V (3a) aprovadu unanimidade ho rezultadu votasaun a-favór 44, kontra 0 no abstensaun 0.

Notísia Relevante: Bankada CNRT deside la partisipa debate espesialidade proposta OJE 2021

“Ho nune’e poposta-lei Orsamentu Jerál Estadu ba tinan 2021 aprovadu iha Parlamentu Nasionál,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi sala plenária PN.  

Governu submete ona Proposta Lei OJE 2021 ba PN

Tuir Rejimentu Parlamentu Nasionál (RPN) artigu 111 kona-ba votasaun finál globál, alínea 1 mensiona katak bainhira ramata votasaun iha espesialidade iha plenária, halo kedas votasaun finál globál.

PN finaliza debate iha espesialidade no finál globál durante loron neen nia laran.

Orsamentu 2021 ho montante biliaun $1,895, foti hosi reseita fundu minarai  biliaun $1,377 no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Iha planu asaun anuál Governu ba tinan oin, reflete kontinuasaun traballu reforma jestaun finansa públika, ne’ebé inisia susesivu Governu liuhosi roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha Governu implementam orsamentu kada programa.

Bazeia livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1,837.

Kuadru planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS 2030), hanesan dokumentu estratéjiku no dokumentu polítiku.

Prioridade lima ba 2021 mak hanesan bem-estar sosiál, protesaun sosiál no sidadania ho despeza $645.180.926 (35,9%), investe iha ekonomia no finansa públika hamutuk $374.622.063 (20,8%), mellora konetividade nasionál $546.181.052 (30,4%), konsolida no fortalese defeza, seguransa no relasain externa $158.830.873 (8,8%), konsolida no fortalese justisa, demokrasia no direitu umanu $72.428.398 (4%).

Jornalista: Evaristo Soares Martins

Editora: Julia Chatarina

1 KOMENTÁRIU

  1. Parabens e bom susesu ba servisu Nai Deputadus sira PN nb konsegue ona aprova OJE 2021 ho unanimidade, hamutuk Ita bele lori Timor Leste Ida buras liu no Timor tenki ba oin, abra¢os

HAKEREK NO HATÁN

Please enter your comment!
Please enter your name here