Polísia atua hela abitante atus-resin ne'ebé hakarak sai hosi Dili ba munisípiu sira parte loromonu nian iha pontu esntrada Tasi-Tolu, Dili, sesta (02/04/2021). Imajen/Espesiál

DILI, 02 abríl 2021 (TATOLI) –Abitante sira rihun-resin hosi munisípiu parte lorosa’e, loromonu no rai-klaran nian, sesta dadeer ne’e,   halibur-malu iha pontu entrada Kapitál Dili nian, hanesan iha Tasi-Tolu, Manleuana no iha Hera, hakarak fila ona ba sira-nia munisípiu tanba la aguenta ho situasaun serka sanitária (SS) iha Dili ne’ebé fó implikasaun ba sira-nia vida loron-loron nian.

“Ami hakarak fila ona ba ami-nia munisípiu ka ami-nia knua. Ami balun hakarak ba Ermera, balun ba Bobonaro no balun hakarak ba Liquiça. Ami la aguenta ona ho kondisaun atu moris iha Dili,” Feliciano Mota hateten lia hirak ne’e ba Agência Tatoli iha pontu entrada Tasi-Tolu, Dili.

Notísia Relevante : Prezidente Repúblika dekreta Estadu Emerjénsia ba dala-XII

Abitante sira atus-resin hakarak sai hodi Dili ba munisípiu sira parte lorosa’e nian, maibé autoridade polísia haruka sira fila iha pontu esntrada Hera nian. Imajen/Foti hosi Facebook

Argumentu hanesan mós hato’o hosi abitante balun ne’ebé nadodon ba parte munisípiu lorosa’e nian (Baucau, Viqeuque ho Lautem).  Tuir sira katak serka sanitária no konfinamentu domisiliáriu iha kapitál Dili halo sira book aan la di’ak atu buka osan ba sustenta uma-laran.

“Kestaun la’ós han-hemu de’it,  maibé osan mós la iha ona atu ami bele aguenta moris iha Dili, liuliu ami hirak ne’ebé hala’o vida hanesan suffer mikrolete, taxista no ami nia alin balun estudante hela iha kost, la iha ona osan atu selu kost no la iha ona osan atu uza ba presiza loron-loron nian,”  Salustiano da Costa, suffer mikrolete 011 hateten ba Agência Tatoli via telefone.

Salustiano ho nia kolega lubun la bele sai hosi Dili tanba Polísia haruka sira fila fali mai Dili, mezmu sira halo esforsu ona ho sira-nia kbiit rasik to’o iha área Hera atu liu ba Baucau.

Hosi sorin seluk, Komandu Polísia Nasionál Timor-Leste (PNTL) liuhosi Unidade Batallaun  Orden Públiku (BOP), Unidade Espesiál Polísia (UEP), Task Force Dili, Unidade Polísia Marítima (UPM) ho Polisia Militár (PM) FALINTIL-Frosa Defeza timor-Leste (F-FDTL) ‘mantein Lei ho Orden’ hodi la autoriza ba abitante sira-ne’e sai hosi área jurisdisaun Dili.

Abitante sira ne’ebé uza transporte privadu, hanesan karreta no motór  forma liña iha área terminál ba to’o área Benvindo, Tasi-Tolu, hahú kedas tuku 5:00 to’o tuku 7:30 dadeer Otl, maibé autoridade sira la admite ema ida atu sai hosi Dili.

Iha parte Hera nian, tuir Salustiano da costa, hamosu uitoan diskusaun entre abitante sira ho autoridade polísia, maibé maioria koopera hodi fila-fali de’it mai Dili.

Iha fali parte pontu entrada Tasi-Tolu nian, konsege hamosu provokasaun no konflitu ki’ik, tanba ema  balun foti fatuk tuda  hasoru polísia sira ne’ebé halo hela seguransa iha estrada.

Feliciano Mota fó sasin katak maioria ema sira hakarak fila ba Bobonaro, Liquiça ho Ermera estudante universitáriu sira, tanba sira balun hela iha Dili laiha ona  hahán no balun laiha ona osan atu selu kost.

Abitante sira hakarak sai ba Aileu, Ainaro ho Manifahi liuhosi pontu esntrada Manleuana, Dili, sesta (02/04/2021), maibé autoridade Polísia la autoriza. Imajen/foti hosi Facebook

Iha fali pontu entrada Manleuana nian, polísia asegura seguransa no la admite abitante sira atu sai hosi Dili ba Aileu, Ainaro no Manufahi.

Portavós Komandu Jerál PNTL Superintendente Xefe, Arnaldo de Araújo, hateten polísia kontinua halo seguransa másimu, tanba seidauk iha orden hosi Governu hodi fó autorizasaun ba komunidade halo viajen ba munisípiu.

Reuniaun Konsellu Ministru, loron 01 abríl 2021, halo ona alterasaun ba projetu dekretu Governu kona-ba medida ezekusaun deklarasaun Estadu Emerjénsia, ne’ebé efetua hosi dekretu Prezidente Repúblika númeru 17/2021, loron 31 marsu, hodi hatán ba pandemia COVID-19.

Estadu emerjénsia, daudaun ne’e renova ona, abranje territóriu nasionál tomak no vigora entre oras 00.00 hosi loron 03 fulan abríl to’o oras 23.59 loron 02 maiu 2021.

Medida sira ne’ebé impoin iha diploma ne’e maka hanesan ho dekretu Governu anteriór ne’ebé define ona regra ezekusaun sira deklarasaun Estadu Emerjénsia nian.

Destaka de’it katak ba oin ema hotu ne’ebé suspeita katak iha infesaun SARS-CoV-2 ka hetan kontaktu ho indivíduu infetadu ho SARS-CoV-2 iha obrigasaun atu sujeita ba realizasaun teste hodi deteta infesaun hosi Coronavirus foun.

Mantein jeneralidade medida anteriormante sira ne’ebé aprova ona no ne’ebé maka hala’o hela, liuliu proibisaun pasajen fronteira terrestre ba objetivu tradisionál ka kostumeiru no ba asesu merkadu reguladu sira.

Indivíduu hotu-hotu ne’ebé hakarak tama ka sai hosi territóriu kontinua sujeitu ba kontrolu sanitáriu, hodi impede sirkulasaun internasionál ba ema hotu ne’ebé hatudu sintoma infesaun hosi SARS-CoV-2 ka COVID-19.

Indivíduu hotu-hotu ne’ebé diagnose ona COVID-19 tenke sujeitu ba izolamentu terapéutiku, ne’ebé sei bele kumpre iha nia hela fatin, tuir despaxu Ministra Saúde nian.

Konsellu Ministru aprova mós projetu Rezolusaun Governu sira ba manutensaun impozisaun serka sanitária no konfinamentu domisiliáriu jerál populasaun nian iha munisípiu Dili to’o oras 23:59 loron 17 fulan-abríl tinan 2021 no iha Munisípiu Baucau no Viqueque to’o oras 23:59 loron 10 fulan-abríl tinan 2021.

Mantein regra hotu-hotu ne’ebé define ona iha anteriór Rezolusaun Governu ne’ebé impoin ona serka sanitária sira no konfinamentu domisiliáriu iha munisípiu sira ne’e. Nune’e kontinua bandu sirkulasaun ema entre munisípiu sira ne’e no iha munisípiu seluk, exeptu  iha kazu sira ne’ebé ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku ka  realizasaun interese públiku nian.

Mantein nafatin mós impozisaun no konfinamentu domisiliáriu jerál ba ema hotu ne’ebé hela no daudaun ne’e iha Munisípiu Dili, Baucau no Viqueque, exetu ba razaun sira ne’ebé mak antes ne’e define ona, liu-liu razaun sira ba saúde, ba servisu, no ba asesu  sasán no servisu sira primeira nesesidade nian.

Situasaun jerál COVID-19 iha Timor-Leste

Situasaun jerál COVID-19 iha Timor-Leste bazeia ba dadus ofisiál hosi Sentru Integradu Jestaun Krize-Sala Situasaun (CIGC-SS), kinta horiseik (01/04/2021), deteta kazu pozitivu rua (2) iha Munisípiu Ermera. Kazu pozitivu rua  ne’e halo viajen hosi Dili ba Letefoho, iha loron 26 marsu 2021. Iha Dili, sira hela iha Aldeia Golgota, Suku Comoro, Postu Administrativu Don Aleixo, Munisípiu Dili. Ekipa konjunta saúde sei buka-tuir hela kontaktu-besik sira hotu.

Dadus jerál:

1) Kazu foun ohin: 39.

2) Kazu rekuperadu: tolu (3).

3) Total kazu ativu: 451.

  • Husi total kazu foun ohin: mane 20, feto 19;
  • Sintomátiku: haat (4).
  • Asimtomátiku: 35.

4) Hosi kuarta (31/03) mai kinta (01/04), hamutuk hotu LNS halo 1228 testes PCR, inklui 137 testes ba ema ne’ebé halo pedidu atu hetan autorizasaun exepsionál hodi sai hosi serka sanitária iha Munisípiu Dili.

5) Total pedidu autorizasaun exepsionál atu sai hosi serka sanitaria iha Munisípiu Dili iha loron 31 marsu, hamutuk hotu 118. Sekretariadu CIGC responde hotu kedas, maibé 32 pedidu la prienxe  rekizitu tuir Rezolusaun Governu.

Jornalista       : Eugénio Pereira

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here