Prezidente Conselho de Imprensa, Virgilio Guterres. Dokumentasaun Tatoli

DILI, 31 marsu 2021 (TATOLI)—Prezidente Conselho de Imprensa (CI), Virgílio da Silva Guterres, hateten iha implementasaun serka sanitária no konfinamentu obrigatóriu ne’e, Conselho de Imprensa husu ba mídia sira atu kontribui informasaun ne’ebé loloos no momoos ba públiku no labele dezmente faktu sira.

Notísia Relevante: COVID-19: CI preokupa ba kobertura ne’ebé dezakredita Governu

“Conselho de Imprensa fó atensaun ba midía sira atu kontribui informasaun loloos ba públiku liga ho pandemia COVID-19 ne’e. Husu para labele dezmente faktu hodi dezakredita ita-nia Estadu no instituisaun Governu nian liuliu pesoál profisionál saúde sira-ne’ebé servisu ho profisionalizmu,” Virgílio da Silva Guterres hateten ba Agência TATOLI, iha nia knaar fatin, Quintal Boot, Dili, kuarta ne’e.

Nia hatutan, daudaun ne’e ekipa ida iha Conselho de Imprensa kontinua halo kontrolu hodi halo analiza ba notísia sira-ne’ebé dezmente faktu.

“Ami-nia ekipa iha Conselho de Imprensa kontinua halo kontrolu no haree ba notísia ne’ebé dezmente faktu. Maibé, agora serka sanitária entaun ita labele halo loron-loron. Ita hala’o servisu iha uma liuhosi WhatsApp. Karik entre ami mak hetan notísia ne’ebé dezmente faktu, mak ami foti no halo analiza hamutuk. Agora iha notísia besik 20 mak sai foku ba analiza,” nia dehan.

Notísia besik 20 ne’e, nia informa, la’ós de’it ba notísia serka sanitária maibé inklui ho aviaun no Orsamentu Jerál Estadu (OJE) 2021 nian ne’ebé públika hosi mídia online, emprime no eletróniku. Tuir planu, semana oin Conselho de Imprensa sei fó sai rezultadu análiza ne’e ba públiku.

Atu labele desmente faktu ne’e, nia husu ba jornalista sira atu haree fila-fali manual ida ba jornalista sira atu oinsá halo kobertura iha períodu pandemia COVID-19 nian, ne’ebé Conselho de Imprensa hamutuk ho United Nations Development Programme (UNDP) prodús iha 23-24 marsu 2020.

Notísia Relevante: CI husu jornalista sira kumpre kódigu étika jornalistíka

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here