Prezidente Conselho de Imprensa, Virgilio Guterres. Imajen/Dokumentasaun Tatoli.

DILI, 31 marsu 2021 (TATOLI)—Hafoin Konsellu Ministru aprova rezolusaun Governu númeru 12/2021, 08 marsu, ne’ebé impoin serka sanitária no konfinamentu obrigatóriu iha munisípiu Dili to’o ohin loron, jornalista sira nafatin halo kobertura atu haklaken informasaun kona-ba pandemia COVID-19 atu enkoraja públiku hakruuk ba regra ne’ebé Governu estabelese.

Prezidente Conselho de Imprensa, Virgílio da Silva Guterres, hateten durante serka sanitaria ne’e CI preokupa ba publikasaun notísia sira iha mídia, jornalista sira la’ós hatudu faktu atu enkoraja públiku hakruuk ba regra ne’ebé Governu estabelese atu prevene COVID-19, maibé kobertura balun ne’ebé dezakredita fali instituisaun Governu ne’ebé lori públiku atu la fiar fali virus corona ne’e iha Timor-Leste.

Notísia Relevante: CI husu jornalista sira kumpre kódigu étika jornalistíka

“Iha kobertura balun la’ós dezmente faktu ruma maibé buka dezakredita instituisaun Governu nian. Hanesan, dezakredita fali ita-nia pesoál profisionál saúde sira no ba entrevista fonte ne’ebé hateten aat ema no kestiona ita-nia doutór sira. Ida-ne’e hamosu preokupasaun makaas ba Conselho de Imprensa,” Prezidente CI informa ba TATOLI, iha nia knaar fatin, Quintal Boot, Dili, kuarta ne’e.

Virgílio da Silva Guterres hatutan, iha semana dahuluk fulan ne’e nian, CI ho nia ekipa sei halo enkontru ida espesifikamente atu haree análiza rezultadu ba produsaun notísia hosi midía sira iha Timor-Leste, tanba jornalista sira-nia kobertura iha serka sanitária ne’e kulaidade produsaun tun liu.

“Pesoalmente, ha’u halo konkluzaun ida katak kobertura jornalista nian iha serka sanitária kualidade produsaun tún liu no produsaun balun dezde tinan 2000 mai to’o agora,” Virgílio hateten.

Hirak ne’e akontese, tuir nia, tanba laiha konfirmasun ba fonte balansu no xefe redasaun ho editór sira la halo cek & ricek ba informasaun ne’ebé jornalista sira kobre iha terrenu.

Ezemplu, nia haklaken, Rádiu Televizaun Timor-Leste (RTTL) ne’ebé iha semana kotuk halo entrevista ho membru Polísia Nasionál Timor-Leste (PNTL) balun iha terrenu maibé jornalista la konfirma ba nia komandante PNTL antes públika notísia.

Maibé, nia dehan, jornalista la sala atu entrevista PNTL ne’e tanba bainhira notísia tama iha sala redasaun, xefe redasaun tenke buka atu konfirma no haruka nia jornalista sira konfirma ho Komandu PNTL nian ka konfirma ba Governu atu hatene despaixu foun ne’e mensiona iha númeru hira, no husu mós ba Koordenadór Sentru Integradu Jestaun Krize (CIJK) atu apoia implementasaun regra moras ne’e.

Iha aspetu barak atu konfirma, nia dehan, liuliu asuntu delikadu ne’ebé implika direitu sidadaun nian atu halo mobilizasaun kuandu bandu ema labele la’o ne’e hamate direitu sidadaun nian.

Regra ne’ebé mak hamate direitu sidadaun nian ne’e, nia hateten, xefe redasaun tenke konfirma katak despaixu ne’e loos ka lae, para evita to’o ikus ema fó sala de’it ba jornalista no jornalista mak sala hela de’it.

Nia fó hanoin, informasaun sira-ne’ebé iha mídia sosiál halo publiku la hakmatek mak jornalista sira-nia servisu ida mak tenke enkoraja katak vírus corona ne’e iha duni no jornalista labele halo parte negasionista sira katak vírus ne’e laiha no vírus ne’e polítika. Ida-ne’e, nia dehan, sira ne’ebé fiar teória konspirasaun ne’e mak bele uza ida-ne’e hodi politiza sasán.

Tanba ne’e, nia enkoraja jornalista sira-ne’ebé akreditadu profesionálmente iha karteira professional ne’e, sira-nia misaun mak atu informa ba públiku katak pandemia COVID-19 ne’e sai ameasa boot ba públiku no globalmente.

“Entaun, ita tenke enkoraja no pasiénsia natoon atu hakruuk ba regra Estadu nian. Ita la dezmente faktu, loos. Maibé, labele iha tendénsia atu dezakredita Governu,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here