Foto hosi sala izolamentu ne’ebé virál iha média sosiál. Imajen/Facebook.

DILI, 30 marsu 2021 (TATOLI)—Sala Situação  Centro Integrado Gestão de Crises (SS- CIGC), liu hosi Koordenadór Pilár VII, Nilton da Silva, husu deskulpa ba públiku, relasiona ho imajen hosi sala izolamentu ne’ebé virál iha média sosiál, iha loron hirak ne’e-nia laran.

Maski la temi fatin loloos,  maibé médiku ne’e rekoñese katak, imajen ne’ebé virál  mai duni hosi sala izolamentu ida no pesoál saúde-sira mak halibur-malu, tuur no han hamutuk iha tempu livre.

Notísia relevante:COVID-19: pozitivu 21 iha Dili, ativu 342

“Ha’u lori ekipa nia naran husu deskulpa ba públiku ba hahalok ne’ebé pesoál saúde-sira halo iha horbain-rua kalan. Sira halibur-malu, han no hemu hamutuk. Hahalok ida ne’e, loloos labele akontese maibé akontese ona no sai hosi ha’u nia kontrolu. Tanba ne’e, lori hau-nia naran no ekipa husu deskulpa. Ami promete katak, sei la halo tan erru sira ne’ebé iha,’’ Nilton da Silva hateten ba jornalista-sira iha sala izolamentu Tasi-tolu, tersa ne’e.

Nia mós bolu ona atensaun ba ekipa ne’ebé komete hahalok ida ne’e, atu ba oin labele akontese tan tanba serbisu ida ne’e serbisu ekipa.

“Ha’u husu ona ba maluk-sira ne’ebé komete hahalok ida ne’e, katak, asaun ida ne’e labele akontese, tanba ita serbisu nu’udár ekipa iha situasaun COVID-19,” nia subliña.

Doutór Nilton mós kompriende pesoál saúde hirak ne’e ninia situasaun tanba semana rua, sira la fila ba uma, maibé risku atu foti hanesan pesoál saúde mak ida-ne’e.

“Tanba ita halo sala ida, ita-nia diak durante ne’e falla hotu. Hanesan koordenadór pilár hitu rekoñese sala sira ne’e hotu,’’ nia rekoñese.

Koordenadór Pilár VII ne’e klarifika katak, iha imajen ne’ebé  virál, la’ós ho pasiente  COVID-19, maibé ekipa pesoál saúde-sira mesak.

Nia klarifika liu tan katak, imajen ne’e rasik pesoál saúde-sira mak hasai duni, maibé iha balun hosi ekipa ne’e deskontente ho hahalok ne’e, no pesoál ne’e ikus-mai publika duni iha média sosiál to’o virál no hetan reasaun makaas hosi públiku.

“Imajen ne’e sira ho sira mak hasai duni no balun deskontente ho hahalok ne’e mak publika tiha. Maibé la buat ida sala ne’e ami rekoñese,’’ nia esklarese.

Antes ne’e, Vise-Ministru Sáude, Bonifácio ‘Maucoli’ dos Reis, hateten fatin izolamentu ne’ebé Governu instala iha Tasi-tolu atu bele akumula pasiente COVID-19 ho kazu moderadu no Ospitál doutór António de Carvalho Lahane sai hanesan fatin ICU ba kazu lizeiru.

Notísia relevante:Bainhira senáriu aat-liu, Governu sei uza Ospitál Lahane

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here