Vise-Ministru Saúde, Bonifácio ‘Mau-Coli’ dos Reis, observa antigu Ospitál doutór António de Carvalho, Lahane. Imajen/Média MS.

DILI, 10 fevereiru 2021 (TATOLI)—Governu liuhosi Ministériu Saúde (MS) prepara ona kondisaun liuliu fatin Intensive Care Unit (ICU) iha antigu Ospitál doutór António de Carvalho, Lahane, atu responde situasaun surtu COVID-19, bainhira Timor-Leste (TL) tama iha senáriu aat-liu.

Tanba ida ne’e maka, Vise-Ministru Saúde, Bonifácio ‘Mau-Coli’ dos Reis observa direta fatin ne’ebé iha ona prosesu reabilitasaun finál.

Notísia Relevante:Ema estranjeiru na’in neen pozitivu COVID-19, pasiente aumenta ba 29

“Ha’u mai atu haree finalidade hosi konstrusaun tanba pasiente COVID-19 loron-loron aumenta, maibé agora sei lizeiru hela. Bainhira aumenta tan kazu grave ruma, maka fatin ne’e disponível ona atu bele akumula pasiente ne’ebé presiza ajudu ho ventiladór,” Vise-Ministru hateten ba jornalista sira iha Lahane, kuarta (10/02).

Governante ne’e esplika, vizita ne’e atu haree oinsá monta ekipamentu ne’ebé nesesáriu, liuliu atu  haree hodi aumenta-tan oksijéniu ba fatin ne’ebé preparadu ona.

“Karik iha senáriu ruma ne’ebé mak aat-liu, iha ne’e fatin preparadu ona atu bele atende,” Bonifácio subliña.

Nia mós observa katak, projetu ne’e konklui ona, maibé presiza aselera adisionál sira ne’ebé halo ona levantamentu no hetan ona verifikasaun hosi Ajênsia Dezenvolvimentu Nasionál (ADN).

Bonifácio mós fó sai katak, Ospitál doutór António de Carvalho Lahane sai hanesan fatin ICU ba kazu lizeiru, fatin iha tasi-tolu sai hanesan Izolamentu ba kazu moderadu sira ho orsamentu ba konstrusaun rihun $400-resin.

“Oras ne’e daudaun sei hein-tan orsamentu adisionál rihun $170, nune’e kontinua halo barrajen, lutu no drainajen,”nia subliña.

Kona-bá rekursu umanu, parte Ministériu Saúde halo ona rekrutamentu ba pesoál limpeza, médiku, enfermeiru no parteira.

Tuir planu, MS sei halo-tan rekrutamentu ba profisionál sira ne’ebé sei halo atendimentu iha ICU.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here