Médiku-sira halo teste swab ba komunidade aldeia 03 suku Fatuhada Dili, kuarta (17/03/21). Imajen Tatoli/António Gonçalves.

DILI, 30 marsu 2021 (TATOLI)—Sala Situação Centro Integrado Gestão de Crise (SS-CIGC), ohin rejista kazu pozitivu foun COVID-19 na’in 51, ne’ebé detetadu iha munisípiu Dili hamutuk 50,  Munisípiu Viqueque na’in-ida, pasiente rekoperadu na’in 11 no númeru pasiente atuál 382.

“Kazu foun 51, rekoperadu 11 no ativu 382,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai dadus ne’e, liu hosi konferénsia imprensa iha Centro Convenções Dili (CCD), tersa ne’e.

Notísia relevante:COVID-19: pozitivu 21 iha Dili, ativu 342

Haree ba evolusaun surtu COVID-19 iha Munisípiu Dili, ohin iha kazu foun 50. Nune’e, kazu detetadu ka pozitivu iha Munisípiu ne’e hahú hosi 7 to’o 30 marsu 2021, hamutuk hotu 415.

Kona-bá evolusaun surtu COVID-19  iha Munisípiu Viqueque, doutór Rui Maria de Araújo, hateten ohin iha kazu pozitivu ida. Kazu ida ne’e, kontaktu-besik hosi kuzu iha cluster ezistente.

“Ho nune’e, kazu detetadu iha Munisípiu Viqueque hamutuk hotu 11,” nia subliña.

SS-CIGC mós relata tabela evolusaun surtu COVID-19 iha TL, hahú hosi 22 fevereiru 2021, tuir klasifikasaun transmisaun Organizasaun Mundiál Saúde (OMS), Munisípiu Dili totál kumulativu kazu 415 no kazu foun iha oras 24 ikus hamutuk 50,  Baucau totál kumulativu kazu 26, Covalima totál kumulativu kazu 19, Viqueque totál kumulativu kazu 11 no kazu foun iha oras 24 ikus na’in ida, Lautém totál kumulativu kazu ida, RAEOA totál kumulativu kazu  ida no munisípiu-sira seluk laiha kazu.

Hosi horisehik mai ohin, Laboratóriu Nasionál Saúde (LNS) halo teste PCR 939, inklui ona iha laran 176, ne’ebé mai hosi pedidu autorizasaun esesionál atu sai hosi serka sanitária iha Munisipiu Dili.

Totál pedidu autorizasaun esesionál atu sai hosi no tama mai serka sanitária iha Munisípiu Dili, horisehik 29 marsu, hamutuk hotu 129. Sekretariadu CIGC responde hotu kedas, maibé pedidu 13  la prienxe kritériu tuir Rezolusaun Governu.

SS-CIGC apela ba komunidade iha fatin ne’ebé maluk rekoperadu-sira hela bá, favór labele tauk, tanba sira ne’ebé sai hosi fatin izolamentu, ekipa saúde-sira sertifika ona katak sira laiha ona risku atu hada’et-tutan virus ba ema seluk.

Apela ba populasaun Timor-Leste tomak, liu-liu iha Munisípiu Dili, Baucau ho Viqueque atu nafatin hakmatek, lalika sé tilun ba lia-anin ka rumór sira.

Husu atu pratika nafatin medida sira uza máskara, fase liman beibeik ho sabaun, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Notísia relevante:Imajen hosi izolamentu virál, SS-CIGC husu deskulpa ba públiku

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here