Fakuldade Siénsia Sosiál (FCS) liuhusi Departamentu Komunikasaun Sosiál (DCS), UNTL, serbisu hamutuk ho Komisaun Nasionál UNESCO Timor-Leste, realiza semináriu no abertura ba formasaun ho tema ‘Óinsa hakerek Artigu Jéneru ba Komunikasaun Sosial,’ iha Salaun Katedrál, Díli (8/3). Imajen/Média UNTL.

DILI, 29 marsu 2021 (TATOLI)—Estudante na’in 4.906 hosi Universidade Nasionál Timor Lorosa’e (UNTL), ne’ebé hela kost, seidauk simu foos hosi Ministériu Solidariedade Sosiál no Inkluzaun (MSSI), hodi bele sustenta-an durante serka sanitária.

Dadus ne’e hato’o hosi Vise-Reitór ba Asuntu Akadémiku no Garantia Kualidade, UNTL, Samuel Venâncio de Sousa Freitas ba Agência Tatoli, segunda ne’e.

Notísia relevante:MSSI oferese foos ba estudante universitáriu 2.693 iha kost Dili

“Ita iha estudante 5.157 ne’ebé hela iha kost no ita submete ona naran  ba Ministériu Ensinu Superiór Siénsia no Kultura (MESSK). Iha faze dahuluk estudante na’in 251 mak hetan ona foos, sei falta 4.906 mak seidauk hetan no ita seidauk hetan informasaun,” Samuel Freitas hateten ba jornalista via telefónika.

Estudante 5.157 ne’e, mai hosi fakuldade sia mak hanesan Fakuldade Siénsia Ezata (FCE) 65, Fakuldade Enjeñaria, Siénsia no Teknolojia (FECT) 655, Fakuldade Agrikultura (FAGRI) 661, Fakuldade Direitu (FD) 124, Fakuldade Filozofia Siénsia Umana (FFCH) 165, Fakuldade Medisina no Siénsia Saúde (FMCS) 945, Fakuldade Edukasaun, Arte no Umanidade (FEAH) 1.385, Fakuldade Ekonomia no Jestaun (FEG) 489, Fakuldade Siénsia Sosiál (FCS) 668.

Estudate 251 ne’ebé hetan ona foos hosi MSSI, kompostu hosi fakuldade siénsia ezata na’in 30 no dormitóriu kampus Hera na’in 221.

Samuel Freitas afirma katak, parte universidade sei esforsu atu serbisu hamutuk ho MESSK oinsa ajuda Governu atu bele fó apoiu ba estudante-sira, perante serka sanitária.

Antes ne’e Diretór Jerál MSSI, Rui Manuel Gago Exposto, hateten MSSI simu ona lista universitáriu hosi MESSK hamutuk 5.587 no konsege distribui ona foos hamutuk saka 4.409 ba na’in 2.693.

Universitáriu na’in 2.693 ne’e, mai hosi Instituisaun Ensinu Superiór hamutuk sia kompostu hosi UNPAZ hetan saka 1.586, DIT 373, IOB 726, ISC 84, UNTL 30, UNITAL 936, UNDIL 574, ICS 108 no IPDC 68.

Tuir dadus hosi MSSI, oras ne’e daudaun Governu prepara hela foos iha armazén Centro Logistica Nacional (CLN) hamutuk saka rihun 32.

Notísia relevante:Bainhira deteta foos aat, tenke ba troka iha MSSI

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here