Foos ne’ebé rai iha CLN atu distribui ba komunidade vulneravél-sira. Imajen Tatoli/Egas Cristóvão.

DILI, 23 marsu 2021 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, husu ba Instituisaun Ensinu Superiór-sira katak, bainhira deteta foos aat iha distribusaun ba estudante kost, tenke kontaktu ho ekipa lojístika hodi troka.

Diretór Jerál ne’e husu tanba, balun deteta foos aat saku ida ka rua, maibé jeneraliza katak, Governu fahe foos aat ba estudante-sira.

Notísia relevante:MSSI oferese foos ba estudante universitáriu 2.693 iha kost Dili

“Husu ba Universidade-sira ne’ebé hetan ona foos, bainhira deteta balun aat labele pulika iha média sosiál. Ita haforsa liña koordenasaun, hakbesik mai iha MSSI atu bele troka fali,” Rui Manuel Gago Exposto hateten ba jornalista-sira, iha serbisu fatin Caicoli, tersa ne’e.

Nia rekoñese katak, iha duni fallansu balun hanesan akontese iha Universidade Timor Orientál (UNITAL), foos saku ida mak aat tanba fós ne’ebé rai iha Centro Logistica Nacional (CLN), barak liu, no klaru tenke iha ida rua mak aat.

“Hau orienta kedan ekipa MSSI hodi troka foos aat saka ida iha UNITAL. Foos ne’ebé rai iha armazén CLN, hamutuk saka rihun 32 no hakarak halós de’it konfuzaun-sira katak, Governu laiha intensaun atu fó foos aat ba komunidade,” nia klarifika.

Nia mós fó hanoin, númeru estudante ne’ebé MSSI simu hosi MESSK hamutuk 5.587 no  ekipa la konsege deteta foos balun ne’ebé aat, tanba ne’e nia husu ba universidade-sira atu aprezenta hodi troka.

“Foos ne’ebé ita distribui daudaun ne’e foos foun ne’ebé CLN sosa iha 2020, no asegura hela iha armazén,” nia subliña.

Tuir nia, MSSI distribui ona foos ba estudante ne’ebé hela iha kost mai hosi Instituisaun Ensinu Superiór hamutuk sia.

Hosi númeru ne’e, UNPAZ hetan saka 1.586, DIT 373, IOB 726, ISC 84, UNTL 30, UNITAL 936, UNDIL 574, ICS 108 no IPDC 68, ho totál foos ne’ebé distribui ona hamutuk saka 4.409.

Tuir planu, ohin MSSI sei distribui tan foos saka 257 ba estudante hosi Instituisaun Ensinu Superiór rua mak hanesan Institutu Filozofia São Francisco de Sales (IFSF) Comoro hamutuk saka 23 no Institutu Filozofia no Teolojia (ISFIT), Dom Jaime Garcia Goulart Fatumeta, hamutuk saka 234.

Jornalista: Tomé Amado

Editór: Cipriano Colo

 

HAKEREK NO HATÁN

Please enter your comment!
Please enter your name here