DILI, 21 marsu 2021 (TATOLI)—Governu liuhosi Ministériu Solidariadade Sosiál no Inkluzaun (MSSI) halo intervensaun umanitária hodi fó apoiu foos ba estudante hamutuk 2.693 hosi universidade haat ne’ebé hela iha kost munisípiu Dili.
Vise Primeiru-Ministru no Ministra Solidariadade Sosial Inkluzaun, Armanda Berta dos Santos, informa, tuir dadus ne’ebé Ministériu Ensinu Superior Siénsia no Kultura (MESSK) entrega, estudante hosi instituisaun ensinu superior 13, ne’ebé hela iha kost munisípiu Dili hamutuk 5.576.
“Ohin ita hahú halo intervensaun hodi apoiu foos ba estudante 2.693 iha instituisaun haat, ne’ebé totál foos bazeia ba totál númeru estudante, kada estudante sei hetan foos saka ida,” Ministra Armanda Berta informa iha serimónia entrega apoia umanitária, ne’ebé realiza iha kampus Dili Institute of Technology (DIT) Ai-mutin, dominggu ne’e.
Notísia relevante: Marelia Correia ho inisiativa apoia estudante hosi Uatulari iha Dili
‘Lautém-oan Tane Malu’ apoia nesesidade bázika ba estudante iha Dili
Instituisaun ne’ebé hetan ona apoiu foos hosi MSSI, mak hanesan, estudante hosi DIT hamutuk 373, Institute of Bussiness (IOB) 726, Universidade da Paz (UNPAZ) 1.510 no Instituto Superior Cristal (ISC) 84, nune’e totál estudante hamutuk 2.693.
“Intervensaun ne’e bazeia ba situasaun serka sanitária iha kapitál Dili, ne’ebé konsege hamosu difikuldade ba estudante sira tanba labele asesu apoiu hosi família sira,” Governante ne’e tenik.
Iha biban hanesan, Ministru Ensinu Superior Siénsia no Kultura, Longuinhos dos Santos, hateten durante ne’e MESSK halo aprosimasaun ho jerente instituisaun ensinu superior sira hodi halo levantamentu dadus estudante.
“Dadus sira ne’e mak MESSK aprezenta ba MSSI no ohin hahú realiza ona distribuisaun, faze dahuluk ba instituisaun haat, ne’ebé loke ho DIT no IOB iha parte dadeer no lorokraik kontinua ho UNPAZ no ISC.
Jornalista: Tomé Amado
Editora: Julia Chatarina
