Arsebispu Arkedioseze Dili, Dom Virgílio do Carmo da Silva, SDB, prezide misa Domingu Ramos iha Katedrál Imaculada da Conceição. Imajen Tatoli/Cipriano Colo.

DILI, 28 marsu 2021 (TATOLI)—Iha tradisaun Igreja Katólika, selebrasaun Domingu Ramos hanesan eventu fiar-nian ne’ebé espesiál tebes, tanba serimónia ne’e mak loke dalan ba Semana Santa antes Jesus terus, mate no moris-hias.

Eventu espesiál ne’e, hakerek iha Evanjellu haat mak hanesan Mc,11,1-11, Mat,21,1-11, Lc,19,28-44 no Jo,12,12-19.

Notísia relevante:Tempu kuarezma, Don Virgílio husu sarani sira atu perdua malu

Iha tinan ne’e, sarani Katólika iha Dili la selebra Domingu Ramos hanesan baibain, tanba situasaun surtu COVID-19, no serka sanitária, maibé Arsebispu Arkedioseze Dili Dom Virgílio do Carmo da Silva, SDB, prezide misa iha Katedrál Imaculada da Conceição, no transmite direta hosi Televizaun Grupu Média Nasionál  (GMN-TV) ne’ebé sarani barak partisipa hosi uma.

Liturjia Domingu Ramos ne’e hahú ho bensaun no tula-liman ba ramos tahan. Tuir-mai tama iha sesaun leitura-sira ne’ebé hasai hosi Is, 50,4-7, Sl 21,8-9.17-18a.19-20.23-24 (R.2a), Fil,2,6-11, no Mc, 11,1-10.

Iha omilia, Dom Virgílio do Carmo da Silva, hateten serimónia importante ne’e mak loke dalan ba Semana Santa antes Jesus terus, mate no moris-hias (Páskua).

Selebrante ne’e konsidera jestu ne’ebé Jesus halo hodi haruka korre kuda buru, atu lori tama ba sidade Santa Jeruzalém, hatudu opsaun atu harii reinu foun la’ós ona reinu kavalaria, la’ós ona reinu funu-nian, maibé reinu domin no dame-nian.

“Kuda buru nu’udár animál ida ne’ebé ninia natureza revela Maromak Nia-domin. Tanba ne’e profeta Zacarias mós ko’alia kona-bá haksolok, husu Siaun oan-feto atu haksolok, tanba Liurai mai daudaun ona. Siaun nia oan-feto hanesan parte ida pobre liu iha sidade Jeruzalém. Profeta hawelok sidade ne’e atu haksolok, basá Liurai domin-na’in mai daudaun ona,” haktuir iha omilia.

Arsebispu ne’e kontinua haklaken katak, leitura sira ne’e haktuir kona-bá oinsa Jesus nu’udár Liurai ne’ebé sei muda susar no terus hotu iha sidade ne’e, tanba Nia mak Liurai ne’ebé justu, vitoriozu no la’ós arogante, dominadór maibé haraik-an no humilde.

“Sidade ne’e hein hela Liurai ida ne’ebé sei mai atu serbí hirak ne’ebé kiik no kiak, atu hari reinu foun ida tanba reinu tuan mak reinu ida ne’ebé forte no iha podér hodi domina hirak ne’ebé fraku,” subliña.

Hosi selebrasaun ohin, Dom Virgílio mós fiar katak, Jesus sei tulun sarani ida-idak atu deskobre atitude ne’ebé hakarak de’it domina ema seluk tanba orgullu. Husu Maromak atu fó forsa hodi bele iha korajen atu korre-an hosi nakukun-nia ukun, sai ema ne’ebé hatene haraik-an no dame na’in.

“Maski fízikamente ita la partisipa didi’ak, maibé ha’u konvida sarani hotu atu ho restrisaun-sira ne’ebé idaidak hala’o iha moris, la hamenus ita-nia devosaun no domin ba Jesus atu renova iha semana boot ne’ebé ita hahú daudaun,” Bibi-atan ne’e konvida.

Ramos tahan ne’ebé hanesan sinál vitória iha tempu Romanu, hetan bensaun iha prosesaun inísiu selebrasaun, baibain sarani ida-idak lori no rai iha uma hanesan sinál katak, prontu ona iha fé atu tama ba semana santa. Ramos ne’e rasik sei sunu iha kuarta feira sinzas tinan tuir-mai.

Esplikasaun balun hosi ensiklopédia Lian Indonézia-nian katak, Semana Santa hanesan mós semana paixaun, hakerek ho lian Latín Hebdomada Sancta ka iha lian Inglés Holy Week ne’ebé iha Relijiaun Katólika hanesan semana ida hahú hosi Domingu Ramos to’o Sábadu Santu, tuir kedan ho Domingu Páskua iha loron Domingu.

Nune’e, semana santa iha kalendáriu litúrjiku Kristaun nian maka periúdu semana ida, antes tama ba loron Páskua.  

Referénsia antiga kona-bá kustume Kristaun-nian atu marka semana santa ho nia selebrasaun espesiál-sira, hatuur nanis iha Konstituisaun Apostólika (versíkulu 18,19), ne’ebé mai hosi sékulu III antes Kristu.

Notísia relevante:Don Virgílio: “Kuarta Sinzas, padre sira halo tuir orientasaun CDDS”

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here