Arsebispu ba Arkidioseze Metropolitana Dili, Virgílio do Carmo da Silva. Imajen TATOLI/Egas Cristóvão

DILI, 17 fevereiru 2021 (TATOLI)—Arsebispu Arkedioseze Metropolitana Dili, Don Virgílio do Carmo da Silva, husu ba sarani sira atu iha tempu kuarezma labele ko’alia barak hodi lori lia ba-mai maibé rona barak Maromak nia liafuan atu hakribit sala no perdua malu.

Notísia Relevante: Don Virgílio: “Kuarta Sinzas, padre sira halo tuir orientasaun CDDS”

“Iha inísiu kuaresma ida-ne’e, ita hotu hatene katak sei marka ahu-kdesan ba ita-nia reen-to’os, sinál no simbólu mate nian tanba ahu-kdesan ho signifika  katak ‘Ema mai hosi rai-rahun no sei fila-fali ba rai-rahun’. Tanba ne’e, husu ita labele ko’alia barak lori lia ba-mai maibé rona malu, rona Maromak nia liafuan, hakbesik-aan ba Maromak hakribit sala no perdua malu,” Don Virgílio do Carmo da Silva hateten iha nia omília, bainhira prezide misa ba Kuarta-feira sinza iha Igreja Maria Imaculada Conceição, Katedral Dili, kuarta ne’e.

Don Virgílio husu ba sarani sira, iha tempu kuarezma ida-ne’e haraik aan no ida-idak hanoin deskobre ninia fuan no halo buat di’ak ruma labele buka ema atu basa liman ka gava, maibé halo buat ruma tuir Jesus nia ain-fatin tanba Jesus mak dalan loos.

“Tanba ne’e ita buka no deskobre Maromak nia glória hodi sai ita-nia referénsia. Katak, halo di’ak ba ema labele buka ema atu hahí ita tanba Jesus dehan bainhira ita halo di’ak buka ema hahí ita mak Maromak sei la fó prémiu di’ak ba ita iha Lalehan tanba ita-nia “jatah” hetan ona iha rai,” nia dehan.

Ulun ba uma Kreda ne’e husu ba sarani sira buka nafatin ksolok Maromak nian sai besik liután ba Maromak, tanba bainhira koko moris hakbesik-aan ba Maromak ne’e moris sai lulik no sai ema ne’ebé loos.

“Bainhira ita atu hakbesik-aan ba Maromak, ita tenke dook hosi sasán mundu nian. Tanba dala barak sasán mundu nian halo ita dook hosi imajen Maromak nian ne’ebé ita lori,” Don Virgílio hatutan.

Don Virgílio, apela ba sarani sira iha tempu kuarezma ne’e atu hakaas-aan halo jejun, orasaun no fó ezmola ho fuan no ho laran.

“Tanba ida-ne’e mak dalan atu kura kanek ita ema-nian, atu la’o ba dalan roman ninian,” Don Virgílio hateten.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here