LIQUIÇA, 26 marsu 2021 (TATOLI) – Komunidade Suku Asumano ho Fahilebu, Munisípiu Liquiça, to’o agora seidauk asesu ba liña eletrisidade.
Administradór Munisípiu Liquiça, Domingos da Conceição dos Santos, informa komunidade suku rua ne’e seidauk bele asesu eletrisidade tanba konsekuénsia hosi indivíduu veteranu balun hadau-malu obra ne’e to’o atu baku malu tan.
Notísia Relevante : Tinan-20, aldeia haat iha Fatumea ho aldeia 15 iha Fohorem la asesu eletrisidade
“Eletrisidade kuaze liga hotu ona ba komunidade sira-nia uma iha suku sira ne’ebé pertense ba Munisípiu Liquiça. Iha Suku Leotela mak aldeia balun de’it maka seidauk asesu no komunidade sira Suku Asumano ho Fahilebu seidauk asesu total,” hateten Domingos da Conceição dos Santos, ba Agência Tatoli iha Suku Asumano, foin lalais ne’e.
Nia informa, loloos suku rua ne’e eletrisidade kobre ona, maibé tan de’it indivíduu veteranu sira hadau-malu to’o atu baku-malu mak impede to’o agora eletrisidade seidauk kobre.
“Fahilebu iha 2014 ne’e sukat atu dada ona, maibé impede hosi indivíduu veteranu balun to’o atu baku-malu tan mak para tiha. Iha Asumano mós dada-malu seidauk hetan akordu entre parte sira hadau-malu projetu ne’e,” nia hateten.
Hosi sorin seluk, komunidade iha Suku Asumano, Tome dos Santos, informa katak loos duni durante okupasaun Indonézia tinan-24 to’o agora tinan 20 ukun rasik aan, komunidade Asumano seidauk asesu ba eletrisidade.
“Ami iha ne’e sai vítima ba eletrisidade tanba suku sira iha parte sorin-sorin ahi eletrisidade lakan ona, maibé ami iha parte klaran laiha. Ne’e duni, ami husu ba Governu atu bele tau matan netik mai ami hodi rezolve lalais disputa sira entre indivíduu veteranu sira atu bele fasilita ahi eletrisidade ba ami nia uma,” Tome dos Santos hateten.
Suku sira ne’ebé pertense b area jurisdisaun Munisípiu Liquiça hamutuk 23 iha Postu Administrativu Bazartete, Liquiça Vila no Maubara ho aldeia hamutuk 134.
Notísia Relevante : Covalima Falta Suku Tolu Ho Aldeia 18 Seidauk Asesu Ba Liña Eletrisidade
Jornalista : Hortencio Sanchez
Editór : Francisco Simões