Xefe Suku Fatumea, Júlio da Costa Nunes. Imajen Tatoli/Eugénio Pereira

COVALIMA, 22 fevereiru  2021 (TATOLI)- Iha loron haat nia laran ona, hahú hosi loron 18 to’o loron 22 fevereiru ne’e, jornalista Agência TATOLI, Eugénio Pereira, la’o hamutuk ho autoridade sira Sentru Integradu Jestaun Krize (CIGC) no Forsa Operasaun Terrenu; Polísia Nasional Timor-Leste (PNTL) no FALINTIL-Forsa Defeza Timor-Leste (F-FDTL) haku’ur liña fronteira terrestre Covalima ho Atambua, Indonézia.

Vizita ho karater “operasaun” ne’e ho objetivu atu halo sensibilizasaun ba komunidade sira iha pontu entrada Timor-Leste nian iha area Covalima atu la bele foti risku ‘hakur’ fronteira ilegálmente tanba númeru peste letál COVID-19  iha viziñu Indonézia sa’e maka’as.

Notísia Relevante : Foos folin iha Fatumea sa’e ba $16.00 to’o $17.00

Iha “operasaun” ne’e ekipa forsa traballu CIGC no ekipa Saúde sira foti mós amostra swab COVID-19 nian ba abitante Timoroan sira ne’ebé horik iha suku no aldeia sira ne’ebé pertense iha liña fronteira terrestre Covalima nian.

Hosi knar sira ne’e, ekipa sira hamutuk ho jornalista Agência TATOLI nian iha oportunidade hodi deskansa kalan balun iha Postu Administrativu Fatumea ho Postu Administrativu Fohorem, Munisípiu Covalima.

Triste no neon kraik hafutar forsa traballu ekipa CIGC ho jornalista sira bainhira rona halerik hosi lian-laek sira-nia lian hosi aldeia haat iha Suku Fatumea, Postu Administrativu Fatumea ho aldeia 15 iha Postu Administrativu Fohorem, ne’ebé tinan-20 ona ‘haksumik’ iha nakukun laran tanba la iha liña eletrisidade atu fó roman ba sira-nia moris iha tempu kalan.

Bainhira sai hosi Dili atu ba Covalima halo operasaun territoriál ho misaun “luta kombate propagasaun COVID-19”, buat ne’ebé mosu iha jornalista Eugénio Pereira neon maka aproveita tempu halo refreshing no esplora ambiente matak-malirin iha tanba paizajen natureza sira iha aldeia sira liña fronteira terrestre Timor-Leste nian iha Munisípiu  Covalima mesak furak no kmanek. Sa tan iha tempu udan. Ai-horis sira moris no matak hosi rohan ba rohan.

Notísia Relevante : Moras IRA ho diarea rejista aas iha Sentru Saúde Fatumea

Ironia tebes! hanesan jornalista bainhira to’o iha fatin ruma komesa halo preparasaun ba atividade jornalistiku nian. Ho nune’e komesa buka eletrisidade atu karrega telefone no karrega laptop. Mas realidade sai oin-seluk, iha Fatumea laran la iha liña distribuisaun eletrisidade. Ai-riin eletrisidade nian de’it mós laiha.

Administradór Postu Fohorem, Carlos Carvalho de Araújo. Imajen Tatoli/Eugénio Pereira

Ho pensamentu jornalistika, Eugénio Pereira halo kedas konfirmasaun ho  Xefe Suku Fatumea, Júlio da Costa Nunes, kona-ba oinsá maka to’o ohin loron Fatumea laran laiha liña eletrisidade.

Refere ba pergunta ne’e, Xefe Suku Júlio da Costa Nunes, ho neon kraik no tuku tuur lia tun dehan, “ba dahuluk, ami povu area remotas agradese boot tanba maluk sira jornalista bele mai haree ami nia situasaun moris. Dezde tinan 2000 to’o agora komunidade aldeia haat iha Suku Fatumea la hetan liña eletrisidade.”

Notísia Relevante : Eletrisidade mate, ekipa vijilánsia evakua amostra teste swab COVID-19 hosi Fatumea

Suku Fatumea ho aldeia haat hanesan, Aldeia Fatumea, Mota Ulun, Lebor no Rai Oan ho totál abitante 1.036, mane 504 no feto 532. Suku ne’e pertense iha área baliza ho Lamak Neen, Atambua-Indonézia ho distansia kilómetru 13.

Xefe Suku Júlio sente fuan moras, bainhira haree komunidade sira iha aldeia nasaun viziñu Lanak Neen, Indonézia, eletrisidade lakan, maibé iha parte Fatumea nian, “nakukun” permanente hosi tinan ba tinan.

Nia lia tun dehan, iha tempu ba tempu, Governante sira, Prezidente Repúblika no membru Parlamentu Nasional, sempre mai rona povu nia halerik, maibé to’o agora halerik hirak ne’e hela ho halerik nafatin. Eletrisidade laiha no kondisaun estrada susar tebes atu fasilita transporte públiku asesu to’o suku refere.

“Ami triste tebes tinan 20 ona ami nia povu seidauk asesu ba liña eletrisidade no estrada aat susar tebes ba povu atu halo movimentu,” Xefe Suku Júlio hateten  ba Agência TATOLI iha Aldeia Fatumea, Postu Administrativu Fatumea, Munisípiu Covalima, segunda ne’e.

Povu sira iha área rurál dala ruma sunu de’it ahi oan uza mina rai ka obor no balun uza ona solar panel ne’ebé sira rasik dezenraska ka sosa rasik.

“Se ahi la lakon, oinsá ami ho ami-nia oan atu asesu ba informasaun  liuhosi televizaun ka radio no oinsá maka ami nia oan sira atu estuda iha tempu kalan ho di’ak hanesan ho labarik sira seluk hela iha sidade boot, Dili,” Xefe Suku ne’e hateten.

Nia konfesa katak, tuir loos iha tinan 2014 eletrisidade lakan ona, maibé tanba problema oknum veteranu sira hadau-malu projetu ne’e, maka empata hotu kedas direitu povu tomak Suku Fatumea nian ba asesu eletrisidade to’o  ohin loron.

Alende ida ne’e, nia hatutan, problema estrada aat afeta mós ba povu labele lori sira nia produtu lokál atu ba fa’an iha merkadu, tanba distánsia dook no presu transporte ba pasajeiru viajen hosi Fatumea ba Suai-Vila selu $5.00 kada pasajeiru.

Jornalista Agência TATOLI mós dada-lia ho Administradór Postu Administrativu Fatumea, Filomeno Cardoso kona-ba situasaun ne’e.

Administradór Postu Fatumea ne’e rekoñese katak tinan 20 liu ona maka nia povu iha aldeia sira remotas la sente benefisia direita hosi prosesu dezenvolvimentu, mezmu sira rasik hato’o ona proposta dala barak ba ministériu relevante sira.

Hosi sorin seluk, ekipa forsa traballu CIGC halo “operasaun” mós ba aldeia lubun iha Postu Administrativu Fohorem. Aporoveinta operasaun ne’e, Agência TATOLI komunika kedas ho Administradór Postu Fohorem,  Carlos Carvalho de Araújo, hodi esplora informasaun dezenvolvimentu iha area jurisdisaun Fohorem nian.

Ironia. Situasaun no halerik iha Fatumea mós hanesan ho komunidade aldeia 15 iha Postu Administrativu Fohorem.

“Iha aldeia 15 iha Fohorem mós tinan-20 ona la asesu eletrisidade. Governu haruka tiha kompañia nasionál harii besi-riin eletrisidade no halo instalasaun eletrisidade ba komunidade nia uma, maibé to’o agora la iha fornesimentu enerjia eletrisidade. Nune’e, tinan-20 nia laran komunidade sira aguenta moris la ho naroman eletrisidade,” Carlos Carvalho de Araújo haktuir povu nia halerik.

Postu Fohorem ho suku haat hanesan, Dato II, Dato III, Fohoren no Laktos ho aldeia 15 ho totál abitante 5.779 maka abandona mós hosi dezenvolvimentu eletrisidade no estrada, edukasaun no saúde.

Administradór Carlos Carvalho de Araújo lamenta tebes tanba problema sira ne’ebé povu enfrenta tinan barak nia hato’o beibeik  ba autoridade kompetente sira maibé to’o agora la iha resposta pozitivu.

“Problema sira ne’e ha’u ko’alia dala barak ona to’o ha’u nia ibun ne’e atu naklees atu sai kanek tan de’it mós ema boot sira la preokupa. Ami sira foho-oan kala tenke terus duni tinan ba tinan,” Carlos Carvalho de Araújo hateten.

Nia tatoli tan, ko’alia kona-ba dezenvolvimentu, presiza partisipasaun povu hodi asesu mós informasaun liu hosi kanál televizaun, radio no media online no imprime sira.

Nia husu ba Ministériu Saúde koloka pesoál saúde ba iha postu saúde sira ne’ebé harii ona iha Suku Dato II no Sentru Saúde Fohorem hodi apoiu mós karreta ambulánsia multifunsaun hodi ajuda evakua pasiente sira hosi Fohorem ba Covalima.

Populasaun Suku Dato II, Americo Amaral. Imajen Tatoli/Eugénio Pereira

Iha parte seluk, Americo Ameral, nu’udar komunidade Suku Dato II,  preokupa tanba parte kompañia instala tiha liña  distribuisaun eletrisidade tama sira nia uma, maibé to’o agora sira la hatene bainhira maka eletrisidade bele lakan.

“Fiu ne’e dada tama-sai ami nia uma iha 2018, maibé bainhira loos maka eletrisidade bele lakan. Ida ne’e mak ami nia preokupasaun,” nia  hateten.

Jornalista   : Eugénio Pereira

Editór        : Francisco Simões

1 KOMENTÁRIU

  1. nudar Timor oan fo agradece ba Goevrnu china nebe harii torres eltrisidade iha timor-laran tomak,comunidade maioria hetan ona energi eletrika tanba esforsu Goevrnu China nia suseso La-os timor nia sucessu..ita hotu obsevra servisu kompania timor nian nebe hari deit ahi rinEDTL to,o tinan sanulu resin nunka mas hotu..sorte uluk China mak halo torres EDTL se timor mak kaer karik agora povo timor sei nakukun laran..paraben ba Goevrnu china.

HAKEREK NO HATÁN

Please enter your comment!
Please enter your name here