Administrador Munisípiu Covalima, Afonso Nogueira Nahak.

COVALIMA, 09 Outubru 2019 (TATOLI)-Husi totál suku 30 iha Postu Administrativu hitu (7) ho totál aldeia 148 ne’ebé pertense ba Munisípiu Covalima rejista suku iha 28 maka asesu ona liña eletrisidade, no falta suku 3 ho aldeia 18 maka seidauk asesu ba liña eletrisidade.

Suku tolu ne’ebé seidauk asesu ba liña eletrisidade maka hanesan Suku Dato Tolu no aldeia lima (5) (Postu Fohorem), Suku Beco iha aldeia lima (5), (Postu Suai Vila), Suku Taroman ho aldeia 3 (Postu Fatululik)  no Postu Administrativu Zumalai iha Suku Mape no Suku Usecai no aldeia balun tan too agora seidauk asesu ba eletrisidade dezde Timor-Leste restaura independénsia iha 20 de Maiu 2002.

Antes ne’e, Ba Ajénsia Tatoli, Populasaun Aldeia Halic, Suku Beco, Postu Administrativu Suai, Munisípiu Covalima ho abitante 256 no uma kain 42 no preokupa durante ukun aan tinan 2o ona, maibé povu aldeia ne’e kontinua moris izoladu husi prosesu dezenvolvimentu infraestrutura hanesan, estrada, eletrisidade, edukasaun, saúde no falta bee moos.

Populasaun lamenta, durante ukun aan too agora la iha membru governu ruma hala’o vizita ba sira nia aldeia hodi haree direita problema sosiál ne’ebé tinan barak kesi metin povu nia moris susar asesu ba dezenvolvimentu.

Tuir Lia Na’in Aldeia Halic, Suku Beco, Alberto da Jesus dehan mezmu Timor-Leste selebra festa ona konsulta populár ba dala 20 hodi ukun rasik aan, maibé povu Aldeia Halik seidauk sente benefísiu husi ukun rasik aan.

“Ita selebra festa konsulta populár ba tinan 20 ita ukun aan ona, maibé ha’u dehan ukun aan ne’e ami seidauk sente ukun aan, tanba ami povu triste nafatin tanba la asesu ba estrada, eletrisidade, edukasaun no saúde ba povu susar ba ami atu atu asesu,” informa Alberto Tatoli foin lalais ne’e.

Problema seluk tan maka, povu balun moris mukit too agora sei kontinua sunu ahi oan iha tempu kalan no balun ne’ebé iha osan sosa ona solar panel (tenaga Suria).

“Iha tempu kalan ami nia oan sira atu estuda ahi la iha, ami sunu de’it maka lilin no povu ne’ebé iha osan fa’an animál maka sosa netik tenaga suria para kalan ahi lakan,” tenik nia.

Iha área saúde, tuir nia haree realidade inan feton sira atu partu ka katuas no ferik sira moras tenki hulan ou kateu husi Halik ba Beco lori distánsia kilómetru 5.

Parte seluk, lia na’in ne’e mós lamenta iha kompañia polítika lider partidu polítiku, CNRT, FRETILIN, PD no PLP halo promesa atu dada eletrisidade tama ba aldeia ne’e, maibé promesa la realiza too agora.

Parte seluk, Reprezentante Feto Halic, Maria Octávia de Oliveira dehan problema boot ne’ebé inan feton sira hasoru maka dala ruma too tempu atu partu arraska.

Entretantu, Profesór Eskola Bázika Filiál (EBF), Adão de Jesus preokupa iha tempu Indonézia eletrisidade lakan, maibé Timor-Leste ukun aan eletrisidade la lakon.

“Ami triste no uluk Indonézia tempu eletrisidade lakan, agora ita ukun aan eletrisidade la lakon, ida ne’e sai problema boot ami,” nia lamenta.

Tuir observasaun Agência Tatoli observa realidade estrada tama ba aldeia ne’e hakat mota no aat inklui povu sira nia uma maioria duut too agora balun uza de’it solar panel no balun sei kontinua sunu lilin no ahi oan iha tempu kalan.

Responde ba preokupasaun ne’e, Administradór Munisípiu Covalima, Afonso Nogueira Nahak  rekoñese suku no aldeia sira ne’e too agora seidauk asesu ba liña eletrisidade tanba problema distánsia komunidade balun hela kedas iha área rurál.

Afonso Noqueira dehan, problema seluk tan halo suku balun izoladu la asesu ba liña eletrisidade, no estrada, tanba lider veteranu balun hadau malu projetu hodi afeta projetu dada liña eletrisidade la’o paradu.

“Iha aldeia balun riin eletrisidade ba harii ona, maibé la’ós governu lakohi atu dada eletrisidade. Projetu dada eletrisidade balun paradu, tanba ita nia maun veteranu sira hadau malu projetu, entaun afeta ba problema ahi labele lakan iha aldeia balun. Maibé problema ne’e aprezenta ona ba Ministériu Obra Publika atu tau konsiderasaun iha orsamentu 2020,”dehan Administradór Afonso.

Nia apela ba veteranu Covalima atu unidade atu servisu hamutuk bele liberta povu sai husi moris nakukun liu husi dada eletrisidade tama povu nia uma hodi hetan naroman ba dezenvolvimentu.

Entretantu iha parte seluk, Ministru Obra Públika (MOP), Salvador Eugénio Soares dos Reis Pires, hatete, husi totál suku 452 ne’e, povu porsentu 83 (83%) mak asesu ona enerjia eletrisidade hela porsentu 17 (17%) mak seidauk asesu ba enerjia eletrisidade.

Tanba ne’e, Governu sei implementa projetu eletrisidade tuir pakote to’o tinan 2022 povu tomak bele asesu hotu ona enerjia eletrisidade.

 “Ba eletrisidade ne’e hanesan ha’u pronúnsia tiha ona katak ba 17% ne’ebé mak seidauk iha kobertura, Governu agora prepara hela pakote para halo konstrusaun iha tinan oin mai, iha 67 suku mak seidauk iha asesu, tinan ida-ne’e (2019) ita halo hela levantamentu dadus, halo dezeñu para halo konkursu ba 33 pakote uluk para atu implementa iha 2020, 2020 ita halo tan fali pakote para implementa 32 pakote para implementa iha tinan tuir mai (2021) depois ikus liu mak ida pakote 9 to’o 67 suku, Ida-ne’e mak agora halo hela,” dehan Ministru ba jornalista iha Palasiu Governu.

Aleinde ne’e, ba área rurál sira ne’ebé labele halo ligasaun fíziku ba liña distribuisaun ka dook husi liña eletrisidade mak Governu iha programa eletrifikasaun rurál hodi monta solar penál ba komunidade sira.

“Ita iha mós programa eletrifikasaun rurál iha tinan 2019 ne’e ami tau millaun $1, ne’ebé agora identifika ona área sira izoladu jeográfika ne’ebé labele halo ligasaun fíziku ba liña distribuisaun eletrisidade nian. Entaun ida-ne’e ami servisu ho ekipa husi finansas para atu ezekuta osan ida-ne’e iha subvensaun públika, iha rubrika ne’e para atu halo instalasaun solar penál,” tenik nia.

Daudauk ne’e, MOP liuhosi Diresaun Jerál Eletrisidade (DJE) kontinua halo servisu melloramentu ba sistema distribuisaun enerjia eletrisidade iha kapitál Dili inklui iha munisípiu sira.

Jornalista: Eugénio Pereira

Editór      : Rafy Belo

HAKEREK NO HATÁN

Please enter your comment!
Please enter your name here