PNTL liuhosi Departamentu Nasionál Tránzitu no Seguransa Rodoviária (DNTSR) ho Polísia Tránzitu Munisípiu Dili kontinua halo auto stop ba viatura sira ne’ebé halo movimentu iha tempu kalan. Imajen/PNTL

DILI, 26 marsu 2021 (TATOLI)-Polísia Nasionál Timor-Leste (PNTL), Departamentu Nasionál Tránzitu no Seguransa Rodoviária (DNTSR) ho Polísia Tránzitu Dili, kinta kalan (25/03),  kontinua hala’o auto stop hodi sosializa mós regra serka sanitária no konfinamentu.

Iha atividade ne’e, autoridade Polísia sira halo pasa revista ba viatura sira ne’ebé halo movimentu iha tempu kalan hodi haree dokumentu sira no karta kondusaun, inklui fó atensaun ba abitante sira atu kumpre regra serka sanitária no konfinamentu.

Notísia Relevante : PNTL halo apreensaun ba motorizada 200

Komandante Polisia Departamentu Nasionál Tránzitu no Seguransa Rodoviária Superintendente João Belo dos Reis, informa atividade auto stop ne’e nu’udar parte ida atu fó atensaun ba abitante sira iha Dili hakmatek iha ida-idak nia uma no bainhira sai karik ba nesesidade urjente, hanesan sosa pulsa eletrisidade, sosa ai-moruk ka sosa nesesidade bázika ruma.

Durante halo pasa-revista, PNTL halo mós dezinfeta ba transporte públiku nu’udar parte ida hodi prevene propagasaun surtu COVID-19.

“Atividade rua maka hanesan, ami halo operasaun ijiene hodi dezinfeta ba veíkulu sira ne’ebé halo movimentu iha estrada públiku no atividade seluk maka ami ezekuta regra serka sanitária hodi identifika transporte sira ne’ebé ba mai laiha dokumentu pesoál no dokumentu transporte nian, ami sei halo apreensaun,” Superintendente João Belo dos Reis, informa ba jornalista iha área Colmera, Dili, kinta kalan.

Notísia Relevante : PNTL halo apreensaun ba motor no karreta ne’ebé dokumentu inválidu

PNTL alerta mós ba motorista hala’o viajen tenke lori dokumentu kompletu no orijinál no kondús transporte labele ho velosidade para evita asidente tráfegu.

Tuir dadus ne’ebé Departamentu Nasionál Tránzitu no Seguransa Rodoviária rekolla iha fevereiru 2021 mosu asidente tráfegu hamutuk 130 ne’ebé rezulta ema balun kanek.

“Iha dadus asidente tráfegu hosi fevereiru nian mai ne’e hamutuk ona 130 no iha porsentu 60 maka laiha karta kondusaun. Nune’e ita atu hateten katak, asidente ne’ebé akontese maioria kauza hosi ema sira ne’ebé maka karta kondusaun laiha,” nia hateten.

Komandu PNTL rasik hatún ona desizaun ba polísia kontinua halo operasaun hodi asegura regra serka sanitária no husu atu limita movimentu ne’ebé la nesesáriu durante implementasaun serka sanitária no konfinamentu iha kapital Dili, Baucau ho Viqueque.

Durante auto stop ne’e, PNTL halo mós apreensaun ba motorizada hamutuk 21 no karreta privadu tolu ne’ebé identifika infratór sira laiha dokumentu transporte nian no tuir lei tenke aplika koima.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here