Ofisiais PNTL husi Unidade Tranzitu. Imajen/Antonio Gonçalves

DILI, 21 setembru 2020 (TATOLI)- Operasaun ka auto stop ne’ebé Polísia Tránzitu Munisípiu Dili hala’o iha sábadu liubá, konsege identifika no halo apreensaun ba karreta no motor  liu 30 tanba dokumentu inválidu no balun dokumentu la iha.

Notísia Relevante : PNTL Kontinua Halo Operasaun Ba Movimentu Transporte Públiku

Segundu Komandante Polísia Dili, Superintendente Euclides Belo, informa Seksaun Tránzitu Dili iha semana ne’e halo operasaun maka’as ba motorizada privadu no estadu nian sira hodi kontrola Cartão de Registo de Veículo (STNK, sigla indonézia) no Kartaun Inspesaun tuir dekretu lei númeru 06/2003, artigu 110.

Euclides dehan, PNTL halo apreensaun ba motorizada no karreta barak maka dokumentu inválidu halo apreensaun ba transporte tuir lei atu nain sira tenke trata dokumentu kompletu foin bele ba foti fila fali sira nia transporte.

“PNTL Dili simu ona orientasaun atu garante seguransa rodoviáriu hodi halo planu operasaun mensal no semanál. Ita haree se sira la kumpre regra ita foti medida tuir lei halo apreensaun ba evidénsia lubuk ida sira komete infrasaun tuir lei tenke selu multa ba Estadu,” esplika Euclides Belo ba jornalista, ohin, iha Komandu PNTL Caicoli, Dili.

Operasaun regulariza transporte ne’e ninia objetivu seluk maka atu husu ba públiku hodi kumpre regra tránzitu nian hodi evita asidente.

“Medida ne’ebé polísia halo hanesan edukasaun síviku ba sosiedade atu la’o h transporte iha estrada tenke kumpre lei sira hotu,” Euclides hateten.

PNTL mós alerta ba públiku sira labele koko atu fó subornu ba kualkér membru PNTL bainhira halo operasaun iha terrenu.

Operasaun ne’e,  Euclides afirma, halo mós ba membru PNTL no membru F-FDTL sira atu hotu- hotu lori transporte tenke kompleta dokumentu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here