Membru PNTL hala'o hela seguransa iha pontu entrada Tasi-tolu, sesta, (19/03/21). Imajen Tatoli/António Gonçalves.

DILI, 19 marsu 2021 (TATOLI)-Komandu Polísia Nasionál Timor-Leste (PNTL) Munisípiu Dili, Unidade Tránzitu, halo apreensaun ba motorizada besik 200 durante halo auto stop iha periodu implementasaun serka sanitária.

Komandante Tránzitu Munisípiu Dili, Inspetór Domingos Sarmento, informa motorizada hirak ne’e balun dokumentu inválidu no na’in la ba halo renovasaun iha Servisu Diresaun Nasionál Transporte Terrestre (DNTT) tanba ne’e konsidera viola lei hodi aplika multa hasoru.

Notísia Relevante : PNTL sei halo operasaun rigorozu

Ba Agência Tatoli, sesta ne’e, iha Komandu PNTL Munisípiu Dili, Domingos Sarmento, klarifika katak ba dokumentu veíkulu motorizada no karreta ninia data inválidu ka mate ona iha fulan janeiru 2021 ba kotuk polísia sei la tolera, maibé iha fulan janeiru mai oin sei tolera tanba situasaun serka sanitaria no konfinamentu.

“Iha dekretu Governu iha Estadu emerjénsia klaru, tanba ne’e, ba dokumentu ne’ebé inválidu  bainhira hahú tama iha serka sanitária, ita sei tolera tanba atividade serbisu hotu suspende,” Inspetór Domingos Sarmento afirma.

Motoriza sira ne’e daudaun rai hela iha aredór Komandu PNTL Munisípiu Dili no iha abitante balun nu’udar motór na’in foti fali ona bainhira selu ona multa iha banku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here