Poetiza Timoroan, Alexandra de Araújo Tilman “Sandra Tilman”. Imajen/Espesiál.

DILI, 21 marsu 2021 (TATOLI)—Poetiza Timoroan, Alexandra de Araújo Tilman “Sandra Tilman”, hateten liuhosi mundu poezia nia konsege hetan rekoñesimentu internasional hosi Austrália no Indonézia nu’udar “Best Focal For Poetry” tanba ninia karaterístika lee poeza ho lian ne’ebé aas no bele hamout ema-nia sentimentu.

Notísia Relevante: Sandra Tilman: “Poezia hanesan mundu supranaturál”

“Liuhusi mundu poezia ha´u hetan rekoñesimentu hosi CO Internasional Australia no Indonézia nu´udar “Best Focal For Poetry”. Liuhosi mundu literáriu bele reprezenta Timor-Leste hodi hamriik no tuur hamutuk ho peritu no matenek-na’in hosi nasaun sira seluk hodi sai nu´udar oradór importante mós. Liuhosi mundu literáriu mak nasaun seluk mós rekoñese katak Timor-Leste Bele,” nia informa ba Agência TATOLI iha ámbitu komemorasaun Loron Mundiál Ba Poezia ne’ebé mundu tomak selebra iha kada 21 marsu, liuhosi rede sosiál, domingu ne’e.

Sandra Tilman hatutan, poezia ka testu líriku, hanesan arte tradisionál, ne’ebé utiliza ba linguajen umana ho objetivu estétiku ka krítika sira-ne’ebé re-trata ba kualkér arte, depende imajinasaun hosi autór ba leitór sira.

Nia iha esperiénsia barak mout iha mundu poezia no hatudu momoos katak ema iha kompeténsia mak bele tuur hamutuk, dada-lia no bele konekta ba malu ho poeta sira iha rai-li’ur, maibé kontráriu bainhira tama iha mundu literáriu no hetan konfiansa Reprezenta Nasaun Timor-Leste ba eventu internasionál sira iha rai-li’ur

Nia parte haree únika, tanba sai poeta boot la´ós mai hosi klase kazaku no gravatadu maibé sai poeta boot bele mai hosi ema bai-bain no nia hetan biban atu tuur no hamriik hanesan iha emar matenek ua’in no peritu sira seluk nia oin, hodi hato´o ninia prespetiva murak no kmanek ba sira.

To’o iha biban ne’e, Sandra Tilman hakerek ona livru haat (4) ho ninia títulu mak hanesan Mengenal Tradisi Lisan Mambae (kultura), Lian Rai-Nain (Antalojia Poezia Tetun, Bhs Indonesia, Inglés no Portugés),  Mata-dalan Musidade (Lideransa), Nyanyian Para Arwah (Antalojia Poezia), no livru sira seluk ne’ebé sei prepara ba produsaun mak hanesan Saudozu (Antalojia Poezia Eroi), Ami Lian Laek (Antalojia Drama).

“Koñese ó-nia tradisaun orál nu´udar feto timoroan ida mós ha´u iha vizaun ba mundu hakerek nian ida katak, saida mak iha haú-nia matan, fuan, laran-monu no sentimentu ha´u labele rai de´it, tenke hakerek atu nune´e labele lakon Leet de´it,” nia hateten.

Liafuan ida ne´e mak motiva Sandra Tilman la hakmatek bainhira la halimar ho lapizeira ka surat-tahan, konseitu no hanoin tenke kesar lalais ba laptop atu xave metin no labele lakon hodi públika, no ikus mai jerasaun tuir mai bele aproveita maske pedasuk de´it.

Iha situasaun serka sanitaria (COVID-19) ne’e, maske iha mehi maibé nu´udar poetiza labele halo buat boot ida atu komemora loron mundiál ba poezia ne´e. Maibé, iha maneira simples ida hodi selebra mak hanesan manda nia obra poezia sira ba belun sira hotu liuhusi link iha Page Facebook, Insagram, Twiters, no Youtube atu bele espresa hanoin murak ba selebrasaun loron mundiál ba poezia ne’ebé monu iha loro 21 marsu 2021 ne’e.

Biografia

Alexandra de Araújo Tilman koñesida ho naran Sandra Tilman, moris iha loron 28 maiu 1976 iha Postu Administrativu Maubisse, Munisípiu Ainaro. Poetiza (feto) Timoroan ne’e hala’o moris ho lema “Dezáfiu sira mosu la´ós atu ita sees tiha, maibé tenke hakat Liu”.

Sandra Tilman hasai Estudu kona-ba língua no literáriu no esperiénsia hanorin literáriu hahú tinan 1996 SMPK São José Balide no SMA Negeri 1 Dili.

Iha tinan 2000 to´o 2008 hanorin iha São José Balide iha matéria Bahasa dan Sastra 2008 no ohin loron nu´udar dosente permanente iha UNTL, Fakuldade Edukasaun Arte no Humanidade, Departamentu Dalen-Tetun no Ekipa Institutu Nasionál ba Linguístika(INL) iha UNTL nu’udar eskritora no tradutora.

Notísia Relevante: Poetiza husu Governu dedika loron ida ba “Loron Nasionál Ba Poezia”

Jornalista: Evaristo Soares Martins

Editór: Cancio Ximenes

2 KOMENTÁRIU

HAKEREK NO HATÁN

Please enter your comment!
Please enter your name here