Poetiza Timor-Leste, Alexandra de Araújo Tilman “Sandra Tilman”. Imajen/Espesiál.

DILI, 21 marsu 2021 (TATOLI)—Poetiza Timor-Leste, Alexandra de Araújo Tilman “Sandra Tilman”, hateten selebrasaun loron mundiál ba poezia ne´e atu halo apresiasaun no halo promosaun ba atividade lee, hakerek, publikasaun, no espresaun iha nasaun hotu tanba mundu poezia hanesan mundu supranaturál ida hosi ema ida-nia karaterístika hodi hamaluk ema seluk nia sentimentu.

Notísia Relevante: Loron Mundiál ba Poezia: poezia ai-han klamar nian

“Tuir saída mak ha´u estuda, aprende no aplika durante ha´u-nia moris kona-ba mundu poezia ne’e, mundu poezia hanesan mundu supranaturál ida-ne´ebé koko atu haka´as-aan husi ema-ida ninia karaterístika hodi hamaluk ema seluk ninia sentimentu, mentalidade espirituál nian,” Alexandra de Araújo Tilman “Sandra Tilman” hateten ba Agência TATOLI iha ámbitu komemorasaun Loron Mundiál Ba Poezia ne’ebé mundu tomak selebra iha kada 21 marsu, liuhosi rede sosiál, domingu ne’e.

Tanba, nia hatutan, liuhosi poezia mak poeta ida bele espresa aan tomak ne´ebé mak ema seluk labele halo no hato´o liuhosi ninia sentimentu ba ema seluk hanesan morál, sosiál, kulturál, polítika no filózofia.

Nia dehan, liuhosi poezia mós mak bele kuñese liutan valór oioin no hametin liután domin hodi espresa liafuan kro´at maibé signifikadu, hodi nune´e bele sai nu´udar matadalan no mós motivasaun di´ak ida ba ema seluk atu haree no hadi´a naksalak sira-ne´ebé mak mosu horisehik, ohin no aban bainrua nian.

Poeta Sandra Tilman esplika, hakerek poezia ne´e simples liuhosi meu haree, laran-monu, besik, kaer no sente no tenke lee no lee barak.

“Ita bele iha hanoin oioin maibé laiha ideia atu hakerek ho di´ak, se bainhira ita rasik laiha kuñesimentu ba referénsia ida nu’udar magazen hodi tiru sai kilat musan sira ka fakar sai ita-nia hanoin ba sura-tahan mutin-ninia leten,” nia dehan.

Ba atividade hakerek nian, nia hateten, presiza kría grupu diskusaun ho ema seluk hodi haree hamutuk situasaun reál ba problema no buka solusaun, atu ajuda ema ida-nia hanoin ne’ebé mak analítiku no krítiku atu hakerek no kritika ba obra literária ruma.

Dosente UNTL ne’e husu atu ema ida-ida lalika hakarak atu lee de´it ema seluk ninia obra maibé koko atu hasai mós ideia ruma, atu ema seluk mós bele apresia, no mós lee referénsia barak atu sadik no loron ruma bele hamosu obra ruma karik bele sai mós referénsia ba ema seluk.

Nia haktuir, nia parte hahú hala´o ona asaun kmook ida iha Departamentu Dalen-Tetun iha Universidade Nacional Timor Lorosa’e (UNTL), tanba nu´udar manorin ba matéria poezia, drama no proza, iha maneira balun ne´ebé nia kria no implementa ba estudante sira iha prosesu aprendizajen atu oinsá hamosu vontade no interese nu´udar estudu bázika molok hakat ba teória oioin tuir peritu sira.

Hosi prosesu ne´e, tuir nia, hatudu momoos katak estudante nu´udar timoroan ida mós sira iha duni antusiazamu hakarak atu hatene. Realidade hosi prosesu refere fó rezultadu katak sira hakarak tebes la´ós tán de´it atu hetan valór ka notas di´ak, maibé sira-nia laran monu duni ba mundu poezia no mehi iha futuru sira ida ka rua mós sai nu´udar Poeta.

“Ho estudu reál ida-ne´ebé ha´u-leut ba ne´e, lori hanoin kmook atu dezenvolve foinsa´e sira-nia talentu poezia liuhosi harii grupu espesífiku ba área poezia no mós halo programa estrakurrikulár ba Ensinu Pre-Sekundáriu, Sekundáriu no mós Universitáriu,” nia esplika.

Iha futuru, Sandra Tilman hakarak hakerek livru balun ne´ebé relasiona ho “Dalen-Tetun no Literáriu” hodi buka meiu hato´o ba Ministériu Edukasaun atu haree no tetu hodi enkaixa iha kurríkulu ba Ensinu Pre-Primária no mós Sekundária nian.

Nia hatutan, iha eventu importante sira-ne’e, nia parte hakarak kolabora entre poeta timoroan sira ho ministériu relevante hodi hala´o kompetisaun hakerek no lee poezia, ba estudante sira iha nivél primária to’o universitáriu.

Nune’e mós, nia parte hakarak tebes iha salaun literáriu espesífiku ida ba atividade estudante sira-nian iha biban sira livre hosi aula hodi hakle’an sira-nia koñesimentu ba lee, hakerek, diskusaun, debate ne´ebé mak di´ak liután ba futuru hodi prepara sira-nia rekursu no mós personalidade lideransa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here