Marelia Correia entrega sasán ba estudante universitáriu iha Palapasu, sesta (19/03). Imajen/Natalino Costa

DILI, 19 marsu 2021 (TATOLI)—Marelia Correira ho família, ho inisiativa rasik apoia nesesidade bázika ba estudante universitáriu hosi postu administrativu Uatulari, munisípiu Viqueque, ne’ebé hela iha kost munisípiu Dili.

Governu hasai rezolusaun hodi inpoin serka sanitária no konfinamentu obrigatóriu iha Dili hahú 16 marsu to’o 02 abríl no iha Baucau no Viqueque hahú 16 to’o 29 marsu.

Marelia Correira hateten, nia parte ho família ne’ebé hanesan Uatulari-oan hakarak apoia iha períodu ne’e tanba estudante sira labele fila ba sira-nia fatin.

Marelia Correia. Imajen/Natalino Costa

“Ami ho konsiénsia rasik, maski uitoan maibé espera bele ajuda sira, ho nune’e bele aguenta hodi hein Governu nia apoiu iha tempu badak,” Marelia Correira dehan ba Agência TATOLI iha Palapasu, sesta ne’e.

Notísia relevante: Governu rekolla dadus molok apoia umanitária ba estudante iha kost

Apoia nesesidade bázika ne’e ba estudante Uatulari 100-resin no posibilidade sei kontinua fahe sasán.

“Ami apoia de’it ba Uatolari-oan, tanba tuir ami-nia forsa no kbi’it. Ami-nia apoiu ne’e posibilidade sei kontinua karik ami sei iha kbiit,” nia akresenta.

Sasán empakotamentu ne’ebé distribui ba kada estudante hanesan foos kilograma tolu, sabonete fase liman no deterjen fase ropa.

Sasán ne’ebé fahe ba estudante universitáriu Uatulari-oan ne’ebé hela iha kost Dili. Imajen/Natalino Costa

Iha fatin hanesan, Estudante Universidade Nasionál Timor Lorosa’e (UNTL),  Mário Fernandes da Costa, agradese apoia ne’e tanba bele ajuda, tanba durante ne’e hetan difikuldade no hahán laiha.

“Dalan Dili, Baucau no Viqueque taka, ami araska no inan aman sira difísil haruka hahan mai ami, tanba ne’e ha’u agradese tebes no ogullu tanba Uatulari-oan ho inisiativa ajuda ona ami,” Estudante universitáriu ne’e dehan.

Maski apoia nesesidade bázika ne’e la barak maibé signifikadu tebes ba estudante sira iha tempu defisil ne’e tanba bele kompleta nesesidade durante konfinamentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here