Grupu solidáriu ‘Lautém-oan Tane Malu’ fahe sasán ba estudante universitáriu hosi Lautém ne’ebé hela iha kost iha Dili. Imajen/Novis Risa-Mota

DILI, 19 marsu 2021 (TATOLI)–Grupu Solidáriu ‘Lautém-oan Tane Malu’ ho inisiativa rasik apoia nesesidade bázika ba estudante universitáriu Lautém-oan ne’ebé hela iha kost iha munisípiu Dili.

Iniasiativa ne’e tanba Governu hasai rezolusaun hodi impoin serka sanitária no konfinamentu obrigatóriu iha Dili hahú 16 marsu to’o 02 abríl no iha Baucau no Viqueque hahú 16 to’o 29 marsu.

Responsável Kampu Grupu Solidáriu “Lautém-oan Tane Malu’, Novis Risa-Moto. Imajen/Espesiál

“Ami grupu solidáriu ho inisiativa, hakarak apoia nesesidade bázika ba alin estudante sira ne’ebé iha Dili, tanba durante serka sanitária hasoru situasaun defísil atu hetan apoiu hosi família sira hosi munisípiu Lautém,” Responsável Kampu Grupu Solidáriu ‘Lautém-oan Tane Malu, Novis Risa-Moto, informa ba Agência TATOLI, via telefónika, sesta ne’e.

Notísia relevante: Governu rekolla dadus molok apoia umanitária ba estudante iha kost

Sasán fornese hosi Lautém-oan sira ne’ebé mak hela Dili, hanesan membru Parlamentu Nasionál, eis Deputadu sira, inklui funsionáriu instituisaun Estadu no ajénsia sira.

Apoia nesesidade bázika hanesan foos, supermie, koto no manu-tolun no seluk tan.

Grupu solidáriu ‘Lautém-oan Tane Malu’ fahe sasán ba estudante universitáriu hosi Lautém ne’ebé hela iha kost iha Dili. Imajen/Novis Risa-Mota

“Ami halibur malu, buka dalan no konsege tau hamutuk ai-han hodi bele fó apoiu ba alin estudante sira hodi aguenta iha situasaun serka sanitária iha Dili,” Reponsável ne’e akresenta.

Iha faze apoio dahuluk ne’e, estudante Lautém-oan hamutuk 5.000-resin mak simu ona ai-han ne’ebé konsege distribui foos saka 200-resin, supermie kaixa 500 inklui koto no manu-tolu sira.

Grupu solidáriu ‘Lautém-oan Tane Malu’ fahe sasán ba estudante universitáriu hosi Lautém ne’ebé hela iha kost iha Dili. Imajen/Novis Risa-Mota

Tuir planu, aban (20/03) sei kontinua distribui ai-han ba estudante sira ne’ebé seidauk hetan, tanba ne’e Reponsável husu ba Lautém-oan hotu atu tau hamutuk liman hodi kontinua fó apoiu ba estudante sira liuhosi grupu solidáriu ne’e.

“Apela nafatin ba Lautém-oan tomak, liuliu estudante sira iha kost atu kuidadu-an nafatin no tuir protokolu COVID-19 hanesan uza máskara, fase liman bebeik no asegura distansiamentu sosiál,” Risa-Mota enkoraja.

 Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here