Plenária Parlamentu Nasionál. Imajen Tatoli/António Gonçalves.

DILI, 19 marsu 2021 (TATOLI)—Konferénsia líder bankada parlamentár sira aprova ona ajendamentu hodi diskute proposta alterasaun ba lei defeza nasionál iha semana oin. Proposta-lei ne’e aprezenta hosi Ministériu Defeza.

Notísia Relevante: Governu Halo Alterasaun Dahuluk ba Lei Defeza Nasionál

“Semana oin sei halo diskusaun no votasaun iha jeneralidade kona-ba primeira altersaun ba lei defeza nasionál,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha Parlamentu Nasionál, sesta ne’e.

Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agustinho Siqueira ‘Somotoxo, esplika Governu husu ba Parlamentu Nasionál atu altera artigu hamutuk 12 iha Lei Defeza Nasionál númeru 3/2010.

“Proposta-alterasaun ne’ebé Ministériu Defeza submete mai husu halo alterasaun ba artigu hamutuk 12 iha Lei Defeza Nasionál, atu diskute no aprova iha jeneralidade,” nia hateten.

Nia fundamenta, razaun Governu husu alterasaun tanba la atualiza ona dezde 2010 agora tama ona 2021.

Nia hatutan, evolusaun forsa armada ne’e la’o entaun lei mós tenke atualiza nune’e halo adaptasaun ba situasaun reál.

Prezidente Komisaun B ne’e fó-sai katak, proposta alterasaun husu altera hahú hosi artigu 14, 18, 19, 20, 31, 32, 34 to’o 57 iha Lei Defeza Nasionál númeru 3/2010.

Entretantu Ministru Defeza, Filomeno Paixão de Jesus, esplika proposta alterasaun ba lei defeza nasionál ne’e la’ós muda hotu maibé muda de’it artigu hamutuk 12 tanba eziste durante tinan 10 ona.

“Entaun presiza altera hodi apár ho situasaun sira iha forsa armada,” Ministru Defeza Filomeno Paixão de Jesus, informa ba jornalista sira, hafoin audiénsia ho Komisaun B (Negósiu Estranjeiru, Defeza no Seguransa, kona-ba proposta-lei númeru 21/V(2ª) prosede primeira alterasaun Lei no. 3/2010, iha fulan-janeiru liubá.

Governante ne’e haktuir uluk iha komponente lima (5) iha F-FDTL maibé agora de’it komponente tolu de’it, komponente tasi, lalehan ho rai.

“Tanba ohin mai ko’alia ba ida hodi hatama ba lei ne’e. Uluk ita nunka temi xefe estadu maiór, maibé temi de’it mak xefe estadu maiór jenerál, vise-xefe estadu maiór jenerál no komandante komponente sira. Maibé xefe estadu maiór iha lapsu ida, ita la tau ne’ebé ita hatama hotu para depois nia iha parte hotu iha komandu kuartél jenerál nian,” nia subliña.

Ministru Defeza ne’e hateten, uluk prezidente fó pose de’it ba xefe estadu maiór, vise-xfe estadu maiór no komandante komponente sira, agora aumenta xefe estadu maiór aas liu entaun tenke fó mós pose ba nia.

“Ninia substánsia mak ne’e lei defeza nasionál ne’e liu tinan 10 ona, entaun la korresponde ona ba realidade ne’ebé iha komandu. Tanba iha komandu ne’ebá muda ona estratéjia militár, ita-nia forsa iha rai laran mós muda tiha ona ho sistema reforsa, tanba aumenta unidade FALINTIL. Kuandu estratéjia militár muda ona entaun ita tenke muda mós artigu balun iha Lei Defeza Nasionál,” nia dehan. 

Notísia Relevante: MD propoin altera artigu 12 iha Lei Defeza Nasionál

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here