Ministru Defeza, Filomeno da Paixão de Jesus. Imajen/António Gonçalves

DILI, 27 janeiru 2021 (TATOLI)—Ministru Defeza (MD), Filomeno Paixão de Jesus, husu ba Parlamentu Nasionál atu altera artigu hamutuk 12 iha Lei Defeza Nasionál númeru 3/2010.

Notísia Relevante: Governu Halo Alterasaun Dahuluk ba Lei Defeza Nasionál

“Proposta alterasaun ba lei defeza nasionál ne’e la’ós muda hotu maibé muda de’it artigu hamutuk 12 tanba eziste durante tinan 10 ona entaun presiza altera hodi apár ho situasaun sira iha forsa armada,” Ministru Defeza Filomeno Paixão de Jesus, informa ba jornalista sira, hafoin halo audiénsia ho Komisaun B (Negósiu Estranjeiru, Defeza no Seguransa, kona-ba proposta-lei númeru 21/V (2ª) prosede primeira alterasaun Lei númeru 3/2010, iha PN, kuarta ne’e.

Governante ne’e haktuir uluk iha komponente lima (5) iha F-FDTL maibé agora hela de’it komponente tolu (3) mak komponente tasi, lalehan ho rai.

“Tanba ohin mai ko’alia ba ida hodi hatama ba lei ne’e.
Uluk ita nunka temi xefe estadu maiór, maibé temi de’it mak xefe estadu maiór jenerál, vise-xefe estadu maiór jenerál no komandante komponente sira. Maibé xefe estadu maiór iha lapsu ida, ita la tau ne’ebé ohin ita hatama hotu para depois nia iha parte hotu iha komandu kuartel jenerál nian,” nia subliña.

Ministru Defeza ne’e hateten, uluk prezidente fó pose de’it ba xefe estadu maiór, vise-xfe estadu maiór no komandante komponente sira, agora aumenta xefe estadu maiór aas liu entaun tenke fó mós pose ba nia.

“Ninia substánsia mak ne’e, lei defeza nasionál ne’e liu tinan 10 ona entaun la korresponde ona ba realidade ne’ebé iha komandu. Tanba iha komandu ne’ebá muda ona estratéjia militár, ita-nia forsa iha rai laran mós muda tiha ona ho sistema reforsa tanba aumenta unidade FALINTIL. Kuandu estratéjia militár muda ona entaun ita tenke muda mós artigu balun iha Lei Defeza Nasionál,” nia dehan.

Entretantu Prezidente Komisaun B, deputadu José Agustinho Siqueira “Somotxo”, hateten área defeza no seguransa ne’e iha nia konfidensialidade barak.

“Proposta-alterasaun ne’ebé Ministériu Defeza submete, mai husu halo alterasaun ba artigu hamutuk 12 iha Lei Defeza Nasionál, atu diskute no aprova iha jeneralidade,” nia hateten.

Nia fundamenta, razaun Governu husu alterasaun tanba la atualiza ona dezde 2010 agora tama ona 2021.

Nia hatutan, evolusaun forsa armada ne’e la’o entaun lei mós tenke atualiza nune’e halo adaptasaun ba situasaun reál.

Prezidente Komisaun B ne’e fó-sai katak, proposta alterasaun husu altera hahú hosi artigu 14, 18, 19, 20, 31, 32, 34 to’o 57 iha Lei Defeza Nasionál númeru 3/2010.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here