Primeiru-Ministru, Taur Matan Ruak, prezide reuniaun Konsellu Ministru, iha Ministériu Finansa, Aitarak-Laran, Kuarta (13/05). Imajen/Egas Cristovão

DILI, 13 maiu 2020 (TATOLI) – Governu liuhosi reuniaun Konsellu Ministru (KM) aprova Proposta Lei ne’ebé aprezenta hosi Ministru Defeza, Filomeno da Paixão de Jesus, ba alterasaun dahuluk lei númeru 3/2010 loron 21 maiu, kona-ba Lei Defeza Nasionál.

“Alterasaun ida-ne’e ninia objetivu atu promove amonizasaun ne’ebé di’ak liután entre Lei Defeza Nasionál no konjuntu dokumentu sentrál sira iha definisaun Polítika Defeza Nasionál no ba formulasaun asaun estratéjiku Militár Estadu Timor-Leste ninian mak hanesan Konseitu Estratéjiku Defeza Nasionál, Konseitu Estratéjiku Militár, Sistema Forsa Nasionál, Misaun Forsa Armada sira no Dispozitivu FALINTIL-Forsa Deza Timor-Leste (F-FDTL)”, relata Ministru Reforma Lejizlativa no Asuntu Parlamentár, Fidelis Manuel Leite Magalhãs, liuhosi konferénsia imprensa hafoin reuniaun ezekutivu iha Salaun Ministériu Finansa (MF), Aitarak-Laran, kuarta ne’e.

Governante ne’e adianta, alterasaun ne’e rasik konsagra mós kompeténsia husi Primeiru-Ministru atu propór ba KM, hamutuk ho membru governu ho kompeténsia iha matéria defeza nian, kona-ba nomeasaun no ezonerasaun Xefe Estadu Maiór Forsa Armada.

Diploma ne’e, sei kontinua modifikasaun ba kompozisaun Konsellu Superiór Defeza Militár, ne’ebé klarifika prosesu nomeasaun Xefe Estadu Maiór Jenerál Forsa Armada no Vise-Xefe Maiór Jenerál Forsa Armada.

Alterasaun ne’e mós hasai filafali forsa hosi apoiu jerál organizasaun jerál F-FDTL, maibé integra mós órgaun apoiu sira no forsa apoiu jerál iha Estadu Maiór Jenerál Forsa Armada.

Nune’e mós altera kompozisaun estrutura orgánika husi F-FDTL nian no iha alterasaun ba lei ne’e mós aprova regulamentu ba Disiplina Militár.

“Atu dehan katak Lei Defeza Nasionál ne’e hanesan lei boot ida ne’ebé iha ninia laran iha komponente ketak-ketak no ohin halo alterasaun ba komponente balun iha lei inan ida ba defeza nian”, nia akresenta.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here