Prezidente Parlamentu Nasionál, Aniceto Longuinhos Guterres Lopez.

DILI, 19 marsu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten deputadu bankada Congresso Nacional de Reconstrução de Timorense (CNRT) atu presta deklarasaun depende ba pedidu hosi Ministériu Públiku (MP).

Notísia Relevante: CNRT hein PN hasai imunidade ba Deputadu na’in-21

“Agora pedidu autorizasaun ne’e depende ba Ministériu Públiku. Ministériu Públiku hanoin se iha autorizasaun kala sira haruka karta mai. Se la presiza autorizasaun entaun deputadu na’in-21 sei ba,” Aniceto Guterres informa ba jornalista sira iha Parlamentu Nasionál, sesta ne’e.

Aniceto Guterres hateten, posibilidade presiza autorizasaun de’it, la’ós levantamentu imunidade tanba rátika normál ne’e só autorizasaun kuandu iha investigasaun ka inkéritu iha Ministériu Públiku.

Nia hatutan, levantamentu imunidade ne’e presiza kuandu akuzasaun deduzida ka akuzasaun tama tiha ona tribunál no tribunál marka ona prosesu julgamentu, entaun sei husu mai iha parlamentu atu halo levantamentu imunidade.

Maibé Prezidente Parlamentu Nasionál ne’e informa, to’o oras ne’e parlamentu seidauk simu karta ruma hosi Ministériu Públiku.

Entretantu deputadu sira hosi Bankada CNRT simu ona notifikasaun hosi Ministériu Públiku liuhosi prokuradór titulár iha loron 15 marsu liubá.

Deputadu sira hetan notifikasaun hosi Ministériu Públiku bazea ba keixa hosi Eis Primeiru-Ministru no atuál Sekretáriu Jerál FRETILIN Mari Alkatiri.

Notísia Relevante: Bankada CNRT prontu hatán Alkatiri

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here