CPN-CNRT halo konferénsia imprensa hodi husu no hein Parlamentu Nasionál halo levantamentu imunidade ba Deputadu Bankada CNRT na'in-21. Imajen TATOLI/Evaristo Soares Martins.

DILI, 16 fevereiru 2021 (TATOLI)–Partidu Congresso Nacional de Reconstrução de Timorensse (CNRT) hein Parlamentu Nasionál halo levantamentu imunidade ba Deputadu Bankada CNRT na’in-21 hodi presta deklarasaun iha Ministériu Públiku (MP).

Notísia Relevante: Prezidente CPN-CNRT Xanana Gusmão mak sei hatán Alkatiri iha Tribunál

Sekretáriu Jerál Interinu Partidu CNRT, Jacinto Rigoberto, haktuir reuniaun loron 15 fevereiru 2021, Komisaun Polítika Nasionál halo análize no debate kona-ba asuntu lubuk ida-ne’ebé afeta ba Nasaun, hanesan problema ne’ebé mosu ho COVID-19 Ho tan kona-ba frajilidade instituisaun Estadu nian no mós kona-ba inefisiénsia hosi Governu ne’ebé hatudu loloos inkapasidade iha área oioin.

Membru Komisaun Polítika Nasionál nian buka atualiza andamentu iha prosesu ne’ebé lori sira ba Ministériu Públiku iha loron 14 janeiru liubá mak hanesan Virgílio Simith, Jacinto Viegas, Jacinto Rigoberto no Bendito Freitas, nune’e mós iha loron 5, fulan-fevereiru ne’e, Tomás Cabral, Francisco Ikulai no Francisco da Costa Guterres.

Tanba liu tiha ona loron sanulu, membru Komisaun Polítika Nasionál hato’o preokupasaun kona-ba kontinuasaun ba prosesu ne’e, tanba sira hotu simu Termu Identidade Rezidénsia (TIR) ne’ebé impede liberdade movimentu, la’ós de’it nu’udar membru CPN maibé nu’udar sidadaun.

Iha análize ne’ebé membru Komisaun Polítika Nasionál halo, espresa sira-nia hanoin katak tuir Prokuradór Jerál Repúblika fó-sai iha loron 5 janeiru 2021, molok sai hosi audiénsia ho Prezidente Repúblika.

“Karik Ministériu Públiku sei bolu mós Deputadu 21 hosi Bankada CNRT, ne’e duni, ita hotu tenke hein bainhira mak Parlamentu Nasionál hasai imunidade hosi Deputadu CNRT nian atu bá aprezenta-aan iha Ministériu Públiku, hodi prosesu ne’e bele la’o ba oin,” Sekretáriu Jerál Interinu CNRT, Jacinto Rigoberto, informa liuhosi konferénsia imprensa iha Bairro dos Grilhos, Dili, tersa ne’e.

Tan ne’e, membru Komisaun Polítika Nasional Partidu CNRT, hein ho esperansa katak Ministériu Públiku halo duni servisu ne’ebé di’ak no lalais.

Tanba membru CPN la konkorda ho Termu Identidade Rezidénsia (TIR) atu prolonga indefinidamente. Iha konferénsia imprensa ne’e asina hosi Prezidente CPN-CNRT, Kay Rala Xanana Gusmão.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here