Primeiru-Ministru, Taur Matan Ruak. Imajen TATOLI/Egas Cristóvão

DILI, 17 marsu 2021 (TATOLI)—Primeiru-Ministru (PM), Taur Matan Ruak, hasoru Prezidente Repúblika (PR), Francisco Guterres ‘Lú Olo’ hodi informa situasaun atuál país no preparasaun vasina kontra COVID-19.

Xefe Governu rekoñese, durante ne’e mosu preokupasaun barak iha públiku, maibé Governu deside mantein tipu vasina ne’e tanba halo ona konsulta ho Organizasaun Mundiál Saúde (OMS) no entidade relevante.

“Internasionálmente rekoñesidu maka Organizasaun Mundiál Saúde, seidauk hateten katak vasina AstraZeneca ne’e ladi’ak, tanba ne’e Governu sei mantein nafatin hodi avansa ho vasina ne’e,” PM Taur relata hafoin ramata reuniaun ho Xefe Estadu iha Palásiu Prezidensiál, Bairro Pité, kuarta ne’e.

Notísia relevante: OMS rekomenda tipu vasina AstraZeneca ba Timor-Leste

KM aprova planu vasinasaun kontra COVID-19

Xefe Ezekutivu nota katak nasaun barak realiza ona vasina, tanba úniku ho vasina de’it maka bele halo prevensaun di’ak liu ba vírus, tanba ne’e maka Governu daudaun ne’e halo hela preparasaun atu realiza vasina.

“Informa ba Prezidente Repúblika kona-ba prepasaun vasina, iha pais balun vasinasaun la’o ona, maibé ita-nia nasaun seidauk halo, klaru Governu halo esforsu para ita mós hetan vasina. Kampaña sensibilizasaun Ministériu Saúde hahú tiha ona, kuandu vasina to’o bele realiza ona,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here