Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, segunda (15/02), Imajen TATOLI/Egas Cristovão

DILI, 15 fevereiru 2021 (TATOLI)Reuniaun Konsellu Ministru estraordinária iha segunda ne’e, aprova ona Projetu Rezolusaun Governu kona-ba planu nasionál vasinasaun kontra COVID-19.

Planu ne’e aprezenta husi Vise-Primeiru-Ministru no Ministra Solidariedade Sosiál no Inkluzaun, Armanda Berta dos Santos, hamutuk ho Komisaun Interministeriál ba Elaborasaun no Koordenasaun Ezekusaun Planu Vasinasaun kontra COVID-19, liuhosi Projetu rezolusaun Governu.

Aprezentasaun ne’e konta mós ho partisipasaun Reprezentante Organizasaun Mundiál Saúde (OMS) iha Timor-Leste, Arvind Mathur.

“Planu vasinasaun nasionál kontra COVID-19 ne’ebé agora aprova, prevee tuir rekomendasaun OMS katak vasina di’ak liu ba Timor-Leste maka vasina AstraZeneca, tanba OMS konsidera vasina ne’e seguru no efikáz, no mós iha kondisaun nesesáriu hanesan armazenamentu no refrijerasaun, entre grau rua sentígradu no grau sentígradu ualu, ne’ebé eziste iha país no hanesan similar ba utiliza iha programa vasinasaun nasionál sira seluk,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu.

Iha sorin seluk, Timor-Leste adere ona ba mekanizmu COVAX Facility, ne’ebé 20% populasaun sei asesu gratuita vasina kontra COVID-19.

“Akizisaun no implementasaun vasina ba populasaun 80% iha hela prosesu diskusaun governamentál, hamutuk ho parseiru dezenvolvimentu prinsipál sira, tuir mobilizasaun rekursu, akizisaun no prestasaun servisu sira. Parsela vasina dahuluk ne’e prevee karik bele disponiliza ba país iha inísiu trimestre daruak tinan 2021,” Portavós Governu esplika.

Planu vasinasaun ne’e iha prinsípiu universál, gratuita, asesibilidade no ekuidade, maibé vasina ne’e la’ós obrigatóriu.

Vasina ne’e sei administra tuituir malu ba grupu prioritáriu sira to’o populasaun elejível hodi bele asesu hotu.

“Prevee katak iha faze dahuluk bele vasina populasaun 8%, husi 3% sira seluk ne’ebé korresponde ba traballadór sira iha liña frente, liuliu funsionáriu sira ne’ebé serbisu iha Unidade Kuarentena no Izolamentu, ka iha postu entrada hanesan aeroportu, portu no terrestre,” nia akresenta.

Aleinde ne’e, iha faze dahuluk ne’e, 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

“Iha faze ida-ne’e sei abranje mós, profisionál saúde, profesór sira, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro,” nia hatutan.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here