Ekipa médiku halo teste swab ba komunidade aldeia 03 suku Fatuhada, Dili, kuarta (17/03/21). Imajen Tatoli/António Gonçalves.

DILI, 17 marsu 2021 (TATOLI)—Sala Situasaun Centro Integrado Gestão de Crise (SS-CIGC), kontinua rejista kazu pozitivu foun COVID-19 na’in-ualu mai hosi Dili na’in-neen, Baucau na’in-ida, RAEOA na’in-ida, no pasiente ne’ebé baixa iha sala izolamentu hamutuk 107.

“Kazu foun ualu, rekoperadu lima, ativu 107. Kazu na’in-ualu ohin, iha mane na’in-haat, feto na’in-haat. Idade 15 ema na’in-ida, idade entre 21-30 na’in-hitu. Hotu-hotu asintomátiku,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai kazu pozitivu hirak ne’e, liu hosi konferénsia imprensa zoom, iha Centro Convenções Dili (CCD), kuarta ne’e.

Notísia relevante:COVID-19: pozitivu foun lima iha Dili, izolamentu 104

Parte SS-CIGC  mós fó-sai katak, entrada irregulár hosi fronteira terrestre hosi 1 marsu to’o ohin meiu-dia, hamutuk ema na’in 27.

Evolusaun iha Dili

Hosi kazu foun iha leten, na’in-neen iha Munisípiu Dili, ho detalla hanesan tuir-mai, kazu pozitivu na’in-tolu, hosi aldeia 05, Suku Fatuhada, Postu Administrativu Dom Aleixo. Pozitivu hirak ne’e kontaktu-besik ka hela uma-laran ida ho kazu konfirmadu hosi cluster hanesan, ne’ebé anunsía horisehik.

Kazu pozitivu ida, hosi aldeia São Miguel, Suku Comoro, Postu Administrativu Dom Aleixo. Pozitivu ne’e kontaktu-besik ho kazu pozitivu iha cluster aldeia 05, Suku Fatuhada. Kazu ida ne’e profisionál saúde ida iha HNGV, unidade hemodiálize. Nia serbisu hamutuk ho profisionál saúde ne’ebé horisehik anunsía katak pozitivu.

Kazu pozitivu rua, hosi aldeia Avansa, Suku Bairru Pité, Postu Administrativu Dom Aleixo. Pozitivu rua ne’e kontaktu-besik ho kazu pozitivu iha cluster hanesan, ne’ebé anunsía horisehik.

“Ho nune’e, kazu detetadu ka pozitivu iha Munisípiu Dili hosi 7 marsu to’o ohin, hamutuk hotu 83,” doutór Rui Maria de Araújo subliña.

Ho baze ba informasaun foun ne’ebé ekipa konjunta saúde rekolla, foku ka cluster kazu pozitivu iha Dili, hetan revizaun hosi totál kazu iha 7,15 no 16 marsu, iha BTN II-Terra Santa, Suku Madohi sia, aldeia Gólgota, suku Madohi tolu, aldeia Loron matan, Suku Madohi haat, aldeia Tasi Mean, Suku Comoro ida, aldeia 4 Setembru, suku Comoro rua, aldeia Fomentu I, Suku Comoro tolu, aldeia Fomentu II, Suku Comoro ida, adeia Fomentu III, Suku Comoro rua, aldeia Ai-mutin, Suku Comoro ida, aldeia São Miguel, Suku Comoro ida (foun), aldeia 03, Suku Fatuhada hitu, aldeia 05, Suku Fatuhada neen, aldeia 20 de setembru, Suku Bebonuk haat, aldeia Teki-Teki, Suku Bairru Pité ida, aldeia Frekat, Suku Bairru Pite haat, aldeia 5 outubru, Suku Bairru Pité ida, aldeia Avansa, Suku Bairru Pité ida (foun), aldeia Mate Restu, Suku Vila Verde rua, aldeia Hura, Suku Motael ida,  kuarentena Carla Masion ida, Ministériu Finansa tolu, SEFOPE sia,  Ministériu Transporte no Komunikasaun rua, EMONC (Emergency Obstetrics and Neonatal Care) training iha Hospital Nacional Guido Valadares hitu.

“Kazu detetadu 83 iha Dili ne’e, fahe ba cluster 23, namkari iha instituisaun tolu, eventu ida no Suku hitu, no fatin kuarentena ida, iha Postu Administrativu Dom Aleixo, no mós Postu Administrativu Vera Cruz,” nia salienta.

Rui Maria de Araújo mós aproveita informa nafatin ba públiku katak, diresaun HNGV hola ona medida hodi tau iha kuarentena kolega serbisu-sira iha unidade hemodiálize, halo dezinfesaun, no buka-tuir kontaktu besik hosi kazu ne’ebé pozitivu, no servisu iha HNGV la’o hanesan baibain.

Evolusaun iha Baucau

Ohin, Munisípiu Baucau iha kazu foun ida. Kazu konfirmadu foun ida-ne’e, ba hosi Dili iha 8 marsu. Nia estudante UNTL, iha Dili hela iha aldeia Moris Foun, Suku Comoro, Postu Administrativu Dom Aleixo.

“Hamutuk hotu-hotu Baucau iha kazu konfirmadu hitu, ne’ebé namkari iha cluster rua. Ekipa konjunta saúde buka-tuir ona kontaktu-besik iha Munisipiu Baucau ho Dili,” nia hateten.

Evolusaun iha Viqueque

Iha Munisípiu Viqueque, ohin la iha kazu foun. Ekipa konjunta saúde munisipiu Viqueque iha loron 2 ikus, foti amostra hamutuk 61, amostra 18 hosi ema-sira ne’ebé bá hosi Dili iha loron 6,7, 8, 9 marsu, no amostra 43 hosi ema ne’ebé kontaktu-besik ho kazu konfirmadu na’in-rua.

“Amostra hirak ne’e haruka ona mai Laboratóriu Nasionál Saúde. Hanesan mós ho Baucau, ekipa Laboratóriu Nasionál apoia estabelese kapasidade atu halo teste laboratóriu iha Viqueque. Bainhira volume teste ultrapasa-sira nia kapasidade análiza iha Viqueque maka sei lori mai Laboratóriu Nasionál iha Dili,” nia realsa.

Evolusaun iha RAEOA

Ohin, Autoridade Rejiaun Administrativa Espesiál Oe-cusse Ambeno (RAEOA) informa katak deteta kazu konfirmadu ida, ema estranjeiru ne’ebé tama ho vistu serbisu, auto-kuarentena durante besik semana rua, hafoin halo teste hetan rezultadu pozitivu.

“Sira ne’ebé halo kuarentena hamutuk sei estende tan kuarentena ba loron 14, no ida ne’ebé pozitivu transfere ona ba izolamentu. Hamutuk hotu kazu detetadu iha RAEOA na’in-lima ona, sura hosi hahú pandemia iha 2020 to’o agora,” nia relata.

Apela ba populasaun iha Dili no Timor-Leste tomak, atu lalika halo lai viajen ba RAEOA, hodi nune’e fó tempu ba Autoridade sira foti medida nesesária atu prevene labele iha transmisaun lokál iha RAEOA.

Evolusaun iha Covalima

Kazu pozitivu rua ne’ebé anunsía iha 11 marsu, ida negatigu dala ida ona, hein negativu dala ida tan atu bele konsidera livre hosi virus. Ida fali sei pozitivu.

Ekipa vijilánsia epidemiolójika Munisípiu Covalima-nian ohin ba fali Fatumea atu foti-sira nia amostra.

“Ida ne’e signifika, loron neen ona maka iha Fatumea la mosu tan kazu foun. To’o 25 marsu, loron 14 sura hosi 11 marsu, se laiha tan kazu foun iha Fatumea, bele ona hapara Serka Sanitária ba Fatumea,” nia esplika.

Ohin, CIGC-SS lori fila kazu konfirmadu na’in-lima hosi Fatumean ne’ebé rekoperadu. Bele deklara rekoperadu, ema ne’e tenki iha rezultadu laboratóriu dala-rua tu-tuir malu negativu, ho intervalu mínimu loron ida.

Ekipa konjunta vijilánsia epidemiolójika no Laboratóriu Nasionál na’in 11, ne’ebé fó apoiu ba Munisípiu Covalima, hahú 16 fevereiru 2021, horisehik 16 marsu fila hikas mai Dili.

“Hodi Forsa-Tarefa ba Prevensaun no Mitigasaun Surtu COVID-19 iha Timor Leste nia naran, hakarak agradese-sira nia dedikasaun no serbisu tomak, hodi bele ajuda autoridade saúde, autoridade komunitária, administrativa no militár-sira, hapara ona transmisaun lokál ne’ebé akontese iha Munisípiu Covalima,” Rui Maria de Araújo agradese.

Prevensaun no mitigasaun iha munisipiu-sira seluk

Ekipa konjunta saúde Munisípiu Lautén rekolla amostra 70 hosi ema sira ne’ebé bá hosi Dili iha loron 6,7, 8, 9 marsu, no haruka ona mai Laboratóriu Nasionál.

Husi Munisípiu Lautém mós relata katak horisehik iha ema na’in 16 ne’ebé fila ba Lautém la lori autorizasaun espesiál hosi Diretór Centro Integrado Gestão de Crise, no liu hosi dalan terik Metinaro-Lacló.

“Movimentu sai hosi serka sanitária Dili hirak hanesan ne’e mak lori risku atu hada’et tutan tan COVID-19 ba Munisípiu sira seluk,” nia fó hanoin.

Entretantu, Munisípiu sira seluk hala’o atividade prevensaun no mitigasaun COVID-19 hanesan baibain.

Notísia relevante:Pasiente COVID-19 na’in-lima hosi Fatumean rekoperadu

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here