SS-CIGC hala’o serimónia re-integrasaun ba pasiente rekoperadu na’in-lima hosi postu administrativu Fatumean. Imajen/SS-CIGC.

DILI, 17 marsu 2021 (TATOLI)—Sala Situasaun Centro Integrado Gestão de Crises (SS-CIGC), re-integra pasiente COVID-19 na’in-lima hosi Postu Administrativu Fatumean, Munisípiu  Covalima, ne’ebé rekopera ona.

“Ita-nia ekipa saúde-sira halo evakuasaun mai iha sala izolamentu iha semana hirak liu-bá, no ohin ita bele re-integra hikas ba família, tanba rekopera ona,’’ Diretór SS-CIGC, Brigadeiru Jenerál João Miranda ‘Aluk’, hateten ba jornalista-sira iha Centro Convenções Dili (CCD), kuarta ne’e.

Notísia relevante:COVID-19: pozitivu foun lima iha Dili, izolamentu 104

Aluk konsidera ida ne’e hanesan novidade di’ak tanba esforsu ne’ebé Governu liu hosi Ministériu Saúde halo, iha duni vontade di’ak oinsá fó asisténsia ba pasiente-sira ne’ebé  afetadu ba COVID-19.

Alende pasiente COVID-19 na’in-lima ne’e, SS-CIGC mós re-integra ema na’in-rua nu’udár família ne’ebé kontaktu besik ho ema na’in-lima ne’e, ne’ebé durante semana rua iha hela kuarentena obrigatóriu, tanba sira halo ona teste dala-rua tutuir-malu ho rezutadu negativu.

SS-CIGC fasilita sidadaun hirak ne’e atu transporta to’o iha idaidak-nia hela fatin, no husu atu bainhira sente iha síntoma ruma bele fó hatene lalais ba profisionál saúde ne’ebé besik, hodi fó asisténsia lalais.

Iha fatin hanesan, Xefe Unidade Parseria no Kooperasaun, Ministériu Solidariedade Sosiál no Inkluzaun (MSSI), João Coimbra, hateten MSSI fó mós apoiu ba sidadaun-sira ne’e hodi bele augenta moris iha idaidak nia hela fatin.

Nia dehan, apoiu ida ne’e oferese direta ba pasiente sira ne’ebé halo tratamentu iha izolamentu no rekopera ona,  maski la barak maibé ajuda de’it atu bele han ba loron ida ka rua nian.

“Ami fó apoiu mak hanesan fos, mina no biskuit atu aguenta netik iha loron ida ka rua nia laran molok sira hala’o moris nomál, tanba apoiu ne’e sei kontinua no nível koordenasaun la’o hela,’’ João Coimbra hateten.

Timor-Leste hahú rejista kazu konfirmadu pozitivu COVID-19 iha marsu 2020, to’o tersa 16 marsu 2021 rejista ona kazu pozitivu hamutuk 208, no totál kazu ativu ne’ebé daudaun baixa iha sala izolamentu iha Dili hamutuk 104.

Totál kazu konfirmadu 208, na’in-169 hosi Dili, Covalima 19, Bobonaro na’in-neen, Baucau na’in-neen, Rejiaun Administrativa Espesiál Oé-cusse Ambeno na’in-haat, Liquiçá na’in-rua no Viqueque na’in-rua.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here