Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI, 16 marsu 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, to’o ohin loron foin simu pedidu pagamentu Cesta Bázika hamutuk 42 hosi Ministériu Turizmu, Komérsiu no Indústria (MTKI).

Ministériu implementadór ne’ebé kompostu hosi MTKI, Ministériu Agrikultura no Peska (MAP), Sekretaria Estadu Kooperativa (SEKoop), Sekretaria Estadu Ambiente (SEA) no Sentru Lojíztika Nasionál (CLN, sigla portugés) kontrata empreza fornesedór no distributór hamutuk 173 atu envolve iha programa distribuisaun Cesta Bázika.

“Ba Ministériu implementadór seluk hanesan MAP, SEKoop no CLN, iha 16 marsu 2021, informa mai Diresaun Jerál Tezouru Ministériu Finansa katak sira-nia prosesu aprovizionamentu interna foin to’o iha faze jestaun kontratu (Contract Management),” refere nota ne’ebé Agência TATOLI asesu, tersa ne’e.

Sekuénsia prosesu pedidu pagamentu Cesta Bázika

Sekretariadu Tékniku Fundu COVID-19 kria no aprova Commitment Payment Voucher (CPV). Hafoin hetan ona asinatura, no sei prepara lista inklui karta akompañamentu hodi haruka ba ministériu implementadór programa, ne’ebé ninia prosesu  presiza tempu loron-tolu.

Hafoin simu CPV hosi Sekretariadu Tékniku, ministériu implementadór sira sei hahú prosesu aprovizionamentu hanesan kria Purchase Order (PO), Contract Management, Inspection, Normal Payment, Payment Request Tracking no Expense Voucher, hafoin sei prepara mós pedidu pagamentu hodi submete ba Sekretariadu Tékniku Fundu COVID-19.

Notísia relevante: MKAE husu kompañia fornesedór Cesta Bázika submete dokumentu prosesa pagamentu

Prosesu normál entre loron-tolu to’o haat nia laran, hafoin prosesu aprovizionamentu interna prontu ona, ministériu implementadór sira sei verifika uluk dokumentu atu asegura dokumentu kompletu, loos no prienxe ona rekezitu pagamentu molok submete ba Sekretariadu Tékniku.

Bainhira simu ona pedidu pagamentu hosi ministériu implementadór, Sekretariadu Tékniku sei prosesa dokumentu sira hotu no sei realiza pagamentu bazeia ba pedidu hirak ne’ebé prienxe rekezitu.

Kompañia tenke selu impostu 0,5% hosi totál pagamentu

Molok Sekretariadu Tékniku Fundu COVID-19 realiza pagamentu, kompañia sira hotu tenke kumpre dever selu impostu rendimentu (income tax) 0,5% hosi totál pagamentu.

“Kompaña sira tenke aprezenta sira-nia resibu pagamentu impostu rendimentu ba Sekretariadu Tékniku Fundu COVID-19, atu nune’e bele realiza pagamentu finál,” subliña nota.

Ba pedidu pagamentu hirak ne’ebé mak la prienxe rekezitu, Sekretariadu Tékniku sei fó filafali ba ministériu implementadór sira hodi kompleta no submete filafali.

Antes ne’e, iha semana dahuluk marsu tinan ne’e, Sekretariadu Tékniku Fundu COVID-19 haruka filafali ona CPV ba ministériu implementadór sira.

Notísia relevante: Orsamentu la tranzita, ko’a 7% kada ministériu apoiu Cesta Bázika

Iha fevereiru 2021, Governu liuhosi reuniaun Konsellu Ministru aprova ona deliberasaun ne’ebé orienta liña ministériu sira hotu kontribui 7% hosi alokasaun Orsamentu Jerál Estadu (OJE) 2021 ba kustu programa Cesta Bázika.

Kontribuisaun ne’e tanba pagamentu ba despeza Cesta Bázika tama iha Fundu COVID-19 orsamentu 2020, enkuantu orsamentu ne’e rasik la tranzita ba orsamentu tinan ne’e.

Hafoin MF simu kontribuisaun 7% hosi liña ministériu sira, aloka orsamentu hirak ne’e ba kódigu programa Cesta Bázika no bainhira osan kontribuisaun tama ona iha sistema Government Resouce Planning (GRP), MF notifika ministériu implementadór programa Cesta Básika sira atu hato’o pedidu kompromisu CPV ba Sekretariadu Tékniku Fundu COVID-19 MF.

Despeza ba implementasaun programa Cesta Bázika hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál iha ámbitu rekuperasaun ekonómika.

Ministériu implementadór sira hasai ona despaisu atu estende períodu distribuisaun to’o marsu 2021, maibé Governu suspende atividade distribuisaun durante implementasaun serka sanitária iha Dili, Baucau no Viqueque.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here