Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI, 09 fevereiru 2021 (TATOLI)Relasiona ho sirkulár ne’ebé fó sai husi Gabinete Ministériu Finansa (MF) iha 02 fevereiru, orienta atu kada membru Governu tenke identifika dotasaun orsamentál ho montante 7% husi totál orsamentu instituisaun, atu transfere ba fundu COVID-19 hodi halo pagamentu despeza programa Cesta Bázika.

Sirkulár ne’e bazeia ba deliberasaun Konsellu Ministru iha loron 29 janeiru, liuhosi proposta husi Ministru Koordenadór Asuntu Ekonómiku, Joaquim Amaral no Ministru Finansa, Rui Augusto Gomes, kona-ba orientasaun polítika sira relasiona ho ezekusaun programa Cesta Bázika.

Ba kestaun ne’e, Koodenadór Jerál  Implementasaun programa Cesta Bázika, Osório Florindo da Costa, klarifika Orsamentu Jerál Estadu (OJE) 2020 fundu COVID-19 la tranzita ba orsamentu tinan ne’e no fundu ninia mandatu hotu iha 31 dezembru 2020.

“Agora tenke foti osan tanba la tranzita, uluk ami hato’o proposta atu aumenta osan COVID-19 husi orsamentu 2021 iha Parlamentu maibé infelismente deputadu sira haree montante boot entaun rejeita proposta ne’e,” Koordenadór ne’e dehan hafoin reuniaun avaliasaun entre ministériu implementadór ba implementasaun programa Cesta Bázika, ne’ebé hala’o iha salaun TradeInvest, Colmera, tersa ne’e.

Daudaun iha fornesedór no distribuidór hamutuk 173 mak ezekuta ona kontratu programa Cesta Bázika.

Tuir Koordenadór, agora kompañia sira asina ona kontratu no halo ona distribuisaun ne’ebé balun konklui ona.

“Entaun Governu tenke halo ezersísiu ba pagamentu kompañia sira ne’ebé fornese ai-han ba populasaun sira. Agora programa ne’e realiza ho ajudikasaun direita, kompañia sira iha kontratu no fornese hela, tanba ne’e laiha razaun Governu atu labele halo pagamentu ba kompañia sira,” nia akresenta.

Notísia relevante: Aprovizionamentu akizisaun produtu Cesta Bázika uza modalidade adjudikasaun direta

MKAE husu kompañia fornesedór Cesta Bázika submete dokumentu prosesa pagamentu

Nia esplika, foti osan 7% iha kada ministériu no sekretaria estadu, la fó impaktu ba programa Governu tanba ho koordenasaun husi parte MF no Unidade Planeamentu Monitorizasaun no Avaliasaun (UPMA).

“Normalmente tinan-tinan, ministériu hotu la ezekuta to’o 100%. Balun to’o de’it 98% ka 90%. Entaun restu husi osan sira ne’e to’o hela no ida-ne’e bazeia ba esperiénsia durante ne’e. Tanba ne’e iha razaun atubele hasai osan 7% husi kada ministériu sira atu tau ba programa Cesta Bázika,” nia subliña.

Koordenadór ne’e konsidera, programa Governu ba kurtu prazu ne’e mosu atu motiva no insentiva produtór sira iha situasaun pandemia COVID-19.

Entretantu, bazeia ba sirkulár husi MF, dotasaun ne’ebé identifikadu labele hasai husi kategoria orsamentál saláriu no vensimentu inklui kapitál dezenvolvimentu.

Aleinde ne’e, kada membru Governu aprezenta ba MF to’o 08 fevereiru, hanesan pedidu alterasaun orsamentál ba transferénsia dotasaun ba fundu COVID-19.

Bainhira iha pedidu alterasaun ho montante 7% ba kraik husi valór dotasaun totál husi instituisaun ida, maka tenke justifika razaun imposibilidade transferénsia ho montante superiór.

VIII Governu Konstitusionál introdús ona planu rekuperasaun ekonómika kurtu prazu ba medida haat ne’ebé implementa hahú jullu to’o dezembru 2020 ho totál despeza millaun $113,4, ne’ebé medida hirak inklui ho Cesta Bázika ho totál despeza millaun $71, ne’ebé destina ba sidadaun hotu ne’ebé kada ema sei hetan $25 ba fulan-rua.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here