Komunidade iha kapitál Dili, área Comoro, aldeia 30 Agostu, troka voucher ho produtu Cesta Bázika iha supermerkadu Leader, kinta (15/12). Imajen TATOLI/António Gonçalves

DILI, 28 janeiru 2021 (TATOLI)–Ministru Koordenadór Asuntu Ekónomiku, Joaquim Amaral, hateten Governu foti ona desizaun atubele halo pagamentu ba empreza fornesedór no distribuidór hamutuk 173, ne’ebé ezekuta ona kontratu ba programa Cesta Bázika.

“Ita halo ona desizaun, tanba ne’e husu empreza sira bele submete dokumentu ba ministériu implementádor sira atu husu Ministériu Finansa prosesa pagamentu ba empreza sira ne’ebé kontribui ona iha programa Cesta Bázika,” Ministru Joaquim Amaral, informa iha Palásiu Governu, kuarta ne’e.

Notísia relevante: Aprovizionamentu akizisaun produtu Cesta Bázika uza modalidade adjudikasaun direta

Governu halo ona pagamentu ba empreza balun iha faze dahuluk, ne’ebé fornese no distribui ona produtu ba komunidade sira.

Totál orsamentu ba programa Cesta Bázika hamutuk millaun $71, ne’ebé ekivalente ho totál populasaun hamutuk milaun 1,3, maibé hafoin simu lista atuál husi Ministériu Adminsitrasaun Estatál (MAE) totál populasaun sa’e ba millaun 1,5 ne’ebé orsamentu ba programa ne’e hasa’e ba millaun $82.

Maski nune’e, Governante ne’e rekoñese populasaun iha postu administrativu balun seidauk asesu ba Cesta Bázika tanba kompañia balun seidauk hala’o atividade.

Tuir mekanizmu ne’ebé fó sai husi ministériu implementadór, katak empreza ne’ebé ezekuta ona kontratu bele hatama ona dokumentu atu prosesa nia pagamentu.

“Empreza ne’ebé halo hotu ona, ka halo seidauk hotu bele hatama dokumentu ka relatóriu atu bele halo pagamentu tuir kontratu ho ministériu implementadór sira. Empreza ne’ebé distribui ona 20% bele hatama ona dokumentu ka relatóriu atu halo pagamentu ba 10%,” nia akresenta.

Nune’e, Ministériu Koordenadór Asuntu Ekonómiku (MKAE) mós husu ba kontratór sira atu koopera di’ak ho entidade kompetente sira atubele fasilita prosesu administrasaun hodi labele difikulta parte ida husi kontratu ezekusaun programa Cesta Bázika.

MKAE mós enkoraja ministériu implementadór sira atu kolabora ho kontratór sira rezolve prosesu administrasaun hodi programa rekuperasaun ekonómika ne’e kontinua la’o to’o tempu determinadu.

“Distirbuisaun ho kontratu sira ne’e la’ós MKAE mak halo, maibé ministériu implementadór ida-idak mak halo kontratu ho tipu ajudikasaun direta ho kompañia hamutuk 173,” Ministru Joaquim relata.

Tuir planu distribuisaun produtu Cesta Bázika sei ramata iha fulan-fevereiru nia laran.

Ministériu implementadór iha programa ne’e maka hanesan Gabinete MKAE, Ministériu Turizmu, Komérsiu no Indústria (MTKI, Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here