Estudante Covalima-oan ne’ebé eskola no hela iha Dili, Germano Amaral (liman karuk) no Bernardino Sequeira (liman kuana). Imajen/Espesiál.

DILI, 16 marsu 2021 (TATOLI)—Estudante Covalima-oan ne’ebé eskola no hela iha Dili, Bernardino Sequeira, husu Governu atu lalais fó apoiu nesesidade bázika ba estudante Covalima-oan sira-ne’ebé hala’o sira-nia estudu iha Kapitál Dili no hela uma aluga (kost) tanba daudaun ne’e, sira menus ai-han atu konsumu.

Notísia Relevante: PN husu Governu apoia estudante Covalima iha Dili

Bernardino Sequeira hatutan, Governu presiza apoiu lalais tanba sira-nia munisípu rasik mós lockdown no daudaun ne’e Kapitál Dili mós iha situasaun serka sinitária, entaun ida-ne’e difikulta tebes sira-nia família haruka osan ba sira hodi sosa hahan atu konsumu. 

 “Ami husu Governu apoiu ami ho neseidade báziku tanba ami-nia munisípiu lockdown, inan-aman la haruka osan mai ami, no ami mós nuudár estudante hela iha Dili uma aluga (kost) tan. Osan laiha sosa hahan, tanba ne’e Governu tenke haree situasaun ne’e ho seriedade,” Bernardino Sequeira hateten ba Agência TATOLI liuhosi telefónika,  tersa ne’e. 

Nia dehan, hahan ne’ebé daudaun ne’e nia konsumu hanesan foos hela uitoan mak nia jere duni, maibé sei lato’o atu han tanba loron tolu tan hanesan ne’e foos mós atu hotu ona.

“Hahan ne’ebé daudaun ne’e ha’u konsumu hela uitoan. Entaun jere oinsá atu loron ida han dala tolu nian ne’e. Maibé, la signifika ami iha foos karon no dala ruma ami Covalima-oan mak husu tulun ba malu,” nia haktuir. 

Iha sorin seluk, Germano Amaral, nu’udár estudante daudaun ne’e hala’o nia estudu iha Universidade Nasionál Timor Lorosa’e, ne’ebé hela iha uma aluga iha Manleuana hateten, aplika situasaun serka sanitária ne’e di’ak tanba liuhosi dalan ida-ne’e mak bele prevene moras COVID-19, maibé mós Governu tenke haree ba impaktu seluk hosi COVID-19 ne’e.

“Ba ha’u pesóal serka sanitária ne’ebé aplika iha Dili tantu munisípiu ida-ne’e tanba liuhosi dalan ida-ne’e mak ita bele halakon moras COVID-19. Maibé, ita haree mós ba impaktu sira seluk hosi COVID-19 ne’e rasik hanesan hahan, entaun Governu haree mós ba situasaun sira-ne’e tanba ami hela iha Dili mós hela uma aluga tan,” nia hateten.

Entretantu, Jacob Goldia nu’udár estudante ne’ebé daudaun ne’e hala’o nia estudu iha Universidade Nasionál Timor Lorosa’e, hateten sira la ezije Governu maibé iha situasaun difísil hanesan ne’e sira presiza tebes hetan apoiu hosi Governu.

“Ami komprende situasaun agora ne’e no ami la ezije Governu maibé iha situasaun difisil hanesan ne’e, ami presiza tebes Governu nia apoiu. Tanba, ami hela iha uma aluga tan, dala ruma kost na’in haree ami matan la moos tanba ami seidauk selu sira-nia uma ne’ebé ami aluga hela ba ne’e,” nia dehan.

Nia afirma, antes sira rona informasaun hosi Ekipa servisu Covalima Vitória ho Domin-20 (EKSES) ne’ebé iha Dili husu Governu no timoroan nia apoiu ba komunidade Covalima durante iha serka sanitária katak estudante Covalima oan ne’ebé hala’o esutdu iha kapitál sei hetan mós hahan hosi EKSES Dili nian maibé to’o agora seidauk iha rezultadu.

“Ami halo aprosimasaun ho ekipa EKSES Dili nian, sira iha planu atu fahe hahan ho modelu Cesta bázika ba ami estudante Covalima-oan ne’ebé eskola iha Dili, posibilidade ami sei hetan maibé to’o agora ami seidauk hetan hahan balun hosi parte EKSES Dili ninian,” nia dehan.

Notísia Relevante: Deputadu PLP husu timoroan apoiu komunidade Covalima

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here