Plenária Parlamento Nasionál. Imajen TATOLI/Egas Cristovão.

DILI, 08 marsu 2021 (TATOLI)—Reprezentante Povu iha uma fukun Parlamentu Nasionál (PN) husu Governu apoia estudante sira hosi Munisípiu Covalima ne’ebé oras ne’e hala’o estudu iha Kapitál Dili.

Notísia Relevante: Deputadu PLP husu timoroan apoiu komunidade Covalima

“Husu ba Governu atu fó ajuda urjentemente ba estudante sira hosi Munisípiu Covalima ne’ebé hala’o hela sira-nia estudu iha Kapitál Dili. Estudante sira-ne’e mak susar liu tanba sira ohin laiha (osan), laiha ona, maibé ita-nia maluk sira iha foho sei iha netik batar no aifarina maibé estudante ne’ebé hela iha kost (uma aluga) ne’e susar tebes. Husu ba Governu atu urjentemente haree ba kestaun ida-ne’e,” Deputadu Bankada FRETILIN Alexandrino Cardoso, levanta asuntu ne’e liuhosi plenária, segunda ne’e.

Nia dehan, estudante hosi Covalima ne’ebé oras ne’e hala’o estudu iha universitáriu sira iha Dili enfrenta hela dezáfiu tanba labele ba Covalima hodi husu osan ba inan-aman sira tanba iha hela aplikasaun serka sanitária.

Nia dehan, Governu foti desizaun hodi aplika serka sanitária tanba kauza hosi númeru pozitivu surtu propagasaun COVID-19 maibé Governu tenke konsidera mós nesesidade komunidade nian.

Iha parte seluk, Deputadu hosi Bankada Partidu Demokrátiku (PD), Adriano do Nascimento, husu Governu kontinua apoia nesesidade bázika ba komunidade iha Covalima.

“Hanesan fó apoiu pulsa eletrisidade ninian, karik bele Governu suspende atividade eskolár. Se ita la suspende mak transmisaun ne’e la’o ba-mai, ne’e ita problema ona. Kazu iha Fatumean, labarik esninu primária mós kona hotu. Agora moras ne’e mai to’o ona Dili. Ita tenke tau ona atensaun tanba Estadu nia kapasidade téknika no finanseira limitadu, kuandu ita moras ne’e barak no bele halakon ema-nia vida,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here