Deputadu PLP no Prezidente Grupu Joven Parlamentár, Abel Pires. Imajen TATOLI/Arminda Fonseca.

DILI, 05 marsu 2021 (TATOLI)—Deputadu PLP no Prezidente Grupu Joven Parlamentár, Abel Pires, husu ba entidade hotu liuliu timoroan sira atu apoiu komunidade Covalima liuhosi sasán nesesidade bázika sira.

Notísia Relevante:  CUAT fó apoiu foos saku 70 ba komunidade Covalima

Abel Pires hateten, komunidade Covalima presiza ema hotu-nia apoiu tanba daudaun ne’e situasaun COVID-19 halo Covalima lockdown ka serka sanitária, ne’ebé difisil tebes halo Komunidade labele movimentu entaun prejudika rendimentu família.

“Hanesan Deputadu no Covalima-oan, ha’u apela ba timoroan hotu-hotu nia apoiu ajuda ita-nia komunidade Covalima, ho nesesidade báziku ka saida de’it ami simu. Tanba todan ne’ebé komunidade Covalima hasoru, la’os Covalima nian de’it, maibé ita hotu nian,” Deputadu Abel hateten ba jornalista sira iha Sede RENETIL, Faról, Dili, sesta ne’e. 

Reprezenta povu ne’’e hateten, komunidade Covalima presiza tebes maluk timoroan sira-nia apoiu tanba situasaun ne’ebé agora akontese iha Covalima laiha ema mak hatene loron atu akontese tan ba munisípiu ne’ebé, tanba ne’e hamutuk tula liman ba malu hodi ajuda malu.

Tanba ne’e, nia mós apela ba Governu karik bele iha situasaun serka sanitária ne’ebé iha Covalima ne’e, komunidade bele asesu ba eletrisidade ho gratuita.

“Ha’u husu ba Governu aplika medida hanesan tinan kotuk fó eletrisidade gratuita ba komunidade tanba lockdown uluk ne’e la hanesan ho lockdown agora. Tanba uluk ne’e ba nasaun maibé agora Covalima, komunidade labele halo movimentu ba-mai, tanba ne’e’ presiza Governu haree ba situasaun sira-ne’e,” nia dehan.

Nia argumenta, daudaun ne’e iha asosiasaun no kompañia balun hahú ona apoiu nesesidade báziku ba komunidade Covalima maibé seidauk natoon, tanba ne’e presiza tan apoiu hosi malu timoroan hotu.

Tanba hahú horisehik, nia dehan, estudante hosi Covalima nian ne’ebé hala’o sira-nia estudu iha Dili, hahú halo rejitstu atu hetan nesesidade báziku ruma tanba Covalima lockdown entaun sira labele ba vizita família hodi lori hahan hodi konsumu. 

“Modelu ne’ebé atu apoiu nesesidade báziku ba estudante mak modelu halo hanesan Cesta Bázika maibé sei haree uluk ba estudante ne’ebé hela iha kost (alugadu uma), tanba sira ne’ebé hela ho família ne’e sei di’ak,” nia subliña. 

Dadus provizóriu hosi estudante Covalima ne’ebé hala’o estudu iha Dili, hahú rejistu horisehik hamutuk 2.220 seidauk konta ho ohin nian, tanba daudaun ne’e rejistu la’o hela.

Deptadu ne’e informa, ba maluk timoroan sira-ne’ebé iha posibilidade atu apoiu ba komunidade Covalima, daudaun ne’e fatin mak sede RENETIL faról, Dili.

Jornalista: Arminda Fonseca

Editór: Cancio Ximenes.

1 KOMENTÁRIU

HAKEREK NO HATÁN

Please enter your comment!
Please enter your name here