Produtu Cesta Bázika. Imajen TATOLI/Antónia Gusmão.

DILI, 14 marsu 2021 (TATOLI)—Emprezáriu ne’ebé durante ne’e halo distribuisaun ba programa Cesta Bázika iha Postu Administrativu Liquiçá-Vila, Munisípiu Liquiçá, husu Governu atu aselera prosesu pagamentu, nune’e bele fasilita empreza-sira bele kontinua halo  distribuisaun.

Diretór Kompañia Fu, José Vidigal, hateten durante ne’e distribui Cesta Bázika ba aldeia 10  iha suku Dato, Postu Administrativu Liquiçá-Vila, uza osan rasik no oras ne’e kompleta ona distribuisaun ba hahán no na’an karau mak seidauk distribui hotu.

Notísia Relevante: Suku haat iha Liquiçá Vila seidauk simu Cesta Bázika

“Ami oho ona karau 60, hela de’it karau 30 mak seidauk oho. Bainhira karau 30 ne’e mak ami kompleta ona, entaun ami-nian konklui ona. Hosi distribuisaun ne’e, ami gasta ona rihun $400. Tanba ne’e, ami fó hatene ba Governu tenke aselera prosesu pagamentu. Ita dehan halo rekoperasaun ekonómika, maibé fallansu hanesan ne’e bele oho fali ami kompañia lokál, tanba ami-nia osan sai hotu ona,” José Vidigal hateten ba jornalista Agência Tatoli via telefónika,  domingu ne’e.

Diretór Kompañia Fu konsidera desizaun Governu hodi demora pagamentu ne’e di’ak, maibé problema maka oras ne’e empreza lokál sira labele halo buat ida, enkuantu osan sai hotu ona no susar atu book aan.

“Agora ne’e ami labele halo buat ida, maibé desizaun Governu-nian mak hanesan ne’e ita povu kiik atu ko’alia tán saida,” nia akresenta.

Maski nune’e, nia kompromete atu kontinua fahe tiha na’an-karau ba komunidade ne’ebé seidauk hetan, nune’e bele konklui tuir kontratu ne’ebé estabelese ho Governu.

“Horisehik, ha’u ba tiha Dili atu tula karau, maibé polísia dehan labele tanba COVID-19. Entaun, karau labele tula no oras ne’e sei paradu. Ami hatama ona invoice, maibé la hatene prosesu ne’e to’o bainhira mak bele selu,” nia subliña.

Empreza lokál ne’e rasik hetan fiar hodi halo distribuisaun Cesta Bázika ba aldeia 10 iha suku Dato, Postu Administrativu Liquiçá Vila, tanba estabelese kontratu ho Ministériu Turizmu, Komérsiu no Indústria ho montante rihun $530.

Alende ne’e, kompañia Green Mota-ain ne’ebé hetan fiar hodi distribui ba suku neen hanesan Hatuquessi, Loidadar, Assumano, Leotela, Lukulai no Darulete foin mak konklui suku Hatuquessi no Loidahar.

Diretór Kompañia Green Mota-ain, Domingos Pereira mós husu Goveru atu aselera prosesu pagamentu tanba durante ne’e halo distribuisaun uza osan rasik no osan metade hotu ona.

“Ami hein de’it Governu halo pagamentu lai mak bele kontinua halo distribuisaun. Ami gasta ona metade hosi kontratu, ami asina kontratu kuaze rihun $900. Governu seidauk halo pagamentu, ne’e la’ós ami de’it, kompañia hotu-hotu ne’ebé distribui Cesta Bázika, Governu seidauk halo pagamentu,” nia hateten.

Maski nune’e, Domingos Pereira fiar no iha esperansa Governu sei rezolve preokupasaun hirak ne’e.

Antes ne’e iha segunda (15/02/21) Ministru Koordenadór Asuntu Ekonómiku (MKAE), Joaquim Amaral, hateten Governu deside ona hodi ko’a orsamentu 7%  kada ministériu atu aselera distribuisaun Cesta Bázika no halo pagamentu ba empreza-sira.

Razaun ko’a orsamentu 7% tanba tuir Lei, antes ne’e alokadu iha tinan 2020 ho montante millaun $71, maibé osan la to’o no antes ne’e la orsamenta iha tinan 2021 atu selu empreza distributór Cesta Bázika, nune’e Governu deside halo ajustamentu osan 2021.

Kompañia distributór Cesta Bázika ne’ebé ministériu implementadór-sira ajudika direta hamutuk 173.

Notísia Relevante: Fulan-ne’e, ministériu implementadór Cesta Bázika bele prosesa pagamentu ba empreza

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here