Membru Governu-sira hamutuk ho dirijente hosi ministériu implementadór distribui Cesta Bázika iha Aldeia Palaka, kinta (05/11). Imajen Tatoli/Natalino Costa.

DILI, 13 marsu 2021 (TATOLI)—Administradór Postu Administrativu Liquiçá Vila, Rogério dos Santos, informa distribuisaun programa  Cesta Bázika iha Postu Administrativu Bazartete no Maubara konklui ona.

Maibé, nia hatutan, suku haat (4) ne’ebé lokaliza iha Postu Administrativu Liquiçá Vila, Munisípiu Liquiçá, seidauk simu programa ai-han Cesta Bázika tanba kompañia hein Governu halo pagamentu mak bele kontinua fali halo distribuisaun. 

Postu Administrativu Liquiça Vila iha suku hitu (7) kompostu hosi Suku Dato, Loidahar, Hatuquessi, Assumano, Darulete, Leotela no Lukulai. Hosi suku hitu ne’e, suku tolu mak simu ona cesta bázika mak hanesan Hatuquessi, Loidahar no Dato maibé suku Loidahar no Dato seidauk 100%.

Administradór Postu Administrativu Liquiçá Vila, Rogério dos Santos. Imajen/Espesiál.

“Cesta bázika ne’e hela suku haat iha Liquiçá vila nian hanesan Leotela, Assumano, Darulete no Lukulai mak seidauk simu. Enkuantu suku Hatuquessi, Loidahar no Dato hotu ona (sei hela reklamasaun). Hosi suku Dato nian hela aldeia neen (6) mak seidauk simu na’an tanba kompañia buka karau mak araska,” Administradór Postu Administrativu Liquiçá Vila, Rogério dos Santos informa ba Agência TATOLI liuhosi telefónika, sábadu ne’e.

Administratór Postu Administrativu Liquiçá Vila ne’e akresenta, benefisiáriu  ba cesta bázika hamutuk 29.966 maibé hosi númeru barak liu mak seidauk simu.

Nia dehan, iha Postu Administrativu Liquiçá Vila parte Sekretaria Estadu Kooperativa mak responsabiliza suku neen (6) hanesan Hatuquessi, Loidahar, Darulete, Lukulai, Assumano no Leotela.

Hosi parte Ministériu Komérsiu, Indústria no Ambiente (MTKI) mak responsabiliza ba Suku Dato tanba iha aldeia 10.

“Hosi suku Dato ne’e, sasán seluk fahe hotu ona, hela de’it na’an karau. Tanba, hosi distribuidór aranja naan-karau mak arraska uitoan,” nia informa.

Iha suku Hatuquessi 100% simu ona maibé suku Loidahar hela membru família na’in-95 maibé to’o agora paradu hela.

“Ba Postu Liquiçá Vila nian, kompañia ne’ebé atende ba suku neen (6) ne’e, ha’u telefone ona kompañia maibé kompañia dehan governu halo uluk pagamentu ba sira mak foin mai kontinua fali fahe na’an-karau ne’e,” nia haktuir.

Nia fó-sai katak, kompañia ne’ebé halo distribuisaun cesta bázika iha Liquiçá vila responsabiliza hosi empreza Fu no Green Mota-ain.

Entretantu, Administradór Postu Administrativu Bazartete, João do Nascimento Braz, informa parte Bazartete nian konklui ona molok aplikasaun serka sanitária no konfinamentu obrigatóriu iha Dili.

Postu Administrativu Bazartete kompostu hosi suku sia (9) hanesan Fahilebo, Fatumasi, Lauhata, leorema,Maumeta, Mota Ulun, Tibar Suku Ulmera.

“Parte Bazartete nian totál benefisiáriu hamutuk 36.953 no konklui ona, sei falta de’it mak reklamasaun. Reklamasaun ha’u seidauk bele fó tanba ha’u la dekór,” nia subliña.

Entretantu, Postu Administrativu Maubara iha suku hitu (7) hanesan Guguleur, Guicho, Lissadila, Maubaralisa, Vatuboro, Vatuvou no Vaviquinia.

Administradór Postu Administrativu Maubara, Domingos Alves Correia, fó-sai katak totál abitante iha postu refere hamutuk 24.785.

“Kona-ba benefisiáriu ne’e, ha’u labele pasa informasaun tanba dadus ha’u rai hela iha kantor. Kona-ba distribuisaun ai-haan cesta bázika iha Maubara ne’e ramata hotu ona, so ké iha fali reklamasaun. Reklamasaun ne’e iha tanba sasán la to’o,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here