Komunidade suku Manleuana, postu adminisrativu Don Aleixo, troka voucher ho produtu Cesta Bázika iha supermerkadu Leader, tersa (09/02). Imajen TATOLI/António Gonçalves

DILI, 15 fevereiru 2021 (TATOLI)—Ministru Koordenadór Asuntu Ekonómiku (MKAE), Joaquim Amaral, informa Governu deside ona ko’a orsamentu  7%  kada ministériu sira atu aselera distribuisaun Cesta Bázika no halo pagamentu ba empreza sira.

“Pagamentu ba empreza sira loos ona, ne’ebé ministériu implementadór ida-idak bele hahú ona semana ida ne’e nia laran hodi hahú prosesa administrasaun atu halo pagamentu ba empreza sira ne’ebé halo ona distribuisaun Cesta Bázika tanba orsamentu rezolve ona,” Ministru Joaquim, hateten iha Pálasiu Governu, segunda ne’e.

Notísia relevante: Orsamentu la tranzita, ko’a 7% kada ministériu apoiu Cesta Bázika

Tuir governante ne’e, razaun ko’a orsamentu 7% tanba tuir lei antes ne’e alokadu iha tinan 2020 ho montante millaun $71 maibé osan la to’o no antes ne’e la orsamenta iha tinan 2021 atu selu empreza distributór Cesta Bázika, nune’e Governu deside halo ajustamentu osan 2021.

“Ita ko’a 7% kada ministériu atu taka despeza no ita presiza duni ko’a atu aselera distribuisaun Cesta Bázika no kompleta pagamentu ba empreza ne’ebé seidauk halo,” nia akresenta.

Kompañia distributór Cesta Bázika ne’ebé ministériu implementadór sira ajudika direita hamutuk 173.

“Ita haree iha semana ida-ne’e no semana oin se iha duni razaun ita atu halo estensaun  ba distribuisaun,” Ministru Joaquim afirma.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here