Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 11 marsu 2021 (TATOLI)—Komisaun G ne’ebé trata asuntu edukasaun, juventude desportu no sidadania, rekomenda ba Ministériu Edukasaun, Juventude no Desportu (MEJD) atu integra profesór kontratadu no voluntáriu sira iha prosesu rekrutamentu foun.

Notísia Relevante: MEJD sei rekruta profesór kontratadu 900-resin iha 2021

“Ha’u-nia hanoin profesór kontratadu sira integra iha prosesu rekruramentu foun nu’udar prioridade, nune’e sira bele hetan opurtunidade tanba sira hala’o tiha ona servisu durante tempu naruk. Profesór kontratadu balun kompleta ona tinan 10 no tinan 11, iha rai ne’ebé mak ita husik ema hanorin hela maibé sira-nia estatutu ne’e laloos,” Membru Komisaun G, Deputadu António da Conceição ‘Kalohan’, informa ba Agência TATOLI, iha Dili, kinta ne’e.

Eis Ministru Edukasaun ne’e esplika, Governu bele halo rekrutamentu tanba iha nesesidade hodi kompleta disiplina (matéria) sira-ne’ebé laiha profesór entaun ne’e mós prioridade.

Nia subliña, opsaun rua ne’e bele konjuga hodi haree ba medida prinsipál Governu nian liuhosi konkursu públiku nune’e garante profesór kontratadu no voluntária sira-nia estatutu.

Nia esplika, Governu bele konsidera ideia ne’e hodi bele fó motivasaun ba profesór kontratadu atu hanorin estudante sira.

Nune’e mós Membru Komisaun G, Deputada Domingas dos Santos, propoin Governu liuhosi MEJD fó uluk solusaun ba profesór kontratadu no voluntária hafoin halo rekrutamentu foun.

“Governu tenke fó solusaun uluk ba profestór kontratadu no voluntáriu sira tanba sira-nia servisu ne’e ita tenke konsidera maibé atu pasa profesór permanente tenke liuhosi teste bazea ba méritu tanba ita presiza profesór ida-ne’ebé kualidade,” Deputada Bankada Partidu Libertasaun Populár (PLP), Domingas dos Santos, informa ba Agência TATOLI.

Nia haktuir, durante Komisaun G hala’o fiskalizasaun identifika profesór balun la tama servisu, dalaruma sira hakerek hela iha kuadru husik de’it, ne’e la merese sai profesór.

Tuir relatóriu fiskalizasaun hosi Komisaun G ne’ebé Agência TATOLI asesu, munisípiu Lautem de’it iha profesór kontratadu ne’ebé kontrata hosi MEJD hamutuk 205 no kazuál na’in-29.

Notísia Relevante: MEJD iha ona planu ba estatutu profesór kontratadu 5.203

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here