MInistru Edukasaun Joventude no Desportu, Armindo Maia. Imajen Tatoli/Egas Cristovão.

DILI,22 janeiru 2021 (TATOLI)—Ministériu Edukasaun Juventude no Desportu (MEJD) iha ona planu atu halo rekrutamentu ba profesór kontratadu hamutuk na’in 900 resin iha 2021.

“Agora daudaun orsamentu ne’ebé kontempla iha tinan 2021, sei ba de’it profesór kontratadu 900-resin, tanba ninia planu iha ona,” Ministru Edukasaun Juventude no Desportu, Armindo Maia hateten ba jornalista sira iha edifísiu Ministériu Finansas (MF), Aitarak Laran, sesta ne’e.

Governante ne’e informa katak, oras ne’e daudaun Ministériu hein de’it atu define ninia kritériu sira, bainhira buat hotu-hotu kompletu ona, ministériu sei aselera ninia prosesu.

“Tanba ne’e, ninia prosesu sei la’o tuir planu ne’ebé mak define ona ho ninia orsamentu rasik,” Armindo subliña.

Nia mós atualiza nafatin dadus hosi ministériu katak, oras ne’e daudaun númeru atuál profesór kontratadu hamutuk na’in 5.203.

Entretantu, Orsamentu Jerál Estadu (OJE) tinan 2021 ne’ebé prevee ba MEJD hamutuk millaun $111,5.

Hosi totál orsamentu ne’e, millaun $61,6 aloka ba saláriu vensimentu, millaun $16,6 ba bens serbisu, millaun $2,9 ba kapitál menór, millaun $7 ba kapitál dezenvolvimentu no millaun $23,1 ba transferénsia públika.

Notísia Relevante:MEJD iha ona planu ba estatutu profesór kontratadu 5.203

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here